Бухоро қон қуйиш маркази ходимларига жиноий иш очилди

 

Бухоро вилояти Қон қуйиш маркази масъул ходимлари томонидан донор қонларнинг лаборатория текширув натижалари ўрганилмай туриб, беморларга қуйилгани аниқланди.

 

Ҳуқуқни муҳофаза қилувчи органларнинг ишонч рақамига келиб тушган мурожаат юзасидан Бухоро вилоят Қон қуйиш марказида юқумли касалликларнинг тарқалишига шарт-шароит яратиб бераётган шахсларни аниқлаш бўйича тезкор тадбир олиб борилган. Унга кўра, марказнинг масъул шахслари кўрсатмаси асосида донор қонларга нисбатан ўтказилган лаборатор текширув натижалари ўрганилмасдан беморларга қуйилаётгани маълум бўлган.

 

Қонунчиликка кўра, донорларнинг қони лаборатор текширувдан кейин ўтказилиши белгиланган. Унга кўра, Доноронинг қонида ОИВ/ОИТС, «в» ва «С» гепатитлари ёки бошқа гемотрансмиссив инсфекциялар элементлари аниқланганда қони йўқ қилиниши ва донорликдан четлаштирилиши лозим.

 

Бироқ соҳа мутахассисларидан ташкил топган ишчи гуруҳ томонидан ўтказилган тезкор тадбирда марказда «Қон ва унинг таркибий қисмлари донорлиги тўғрисида»ги Қонун талаблари қўпол равишда бузилгани аниқланган.

 

Масалан, донор Н.Ж.нинг қони ўтказилган лаборатор таҳлил натижалари кутилмасдан бемор Б.Ҳ.гa қуйилган. Тезкор тадбир давомида эса қон қуйиш марказида ўтказилган бирламчи лаборатор текширувда донор Н.Ж.жa заҳм (сифилис) касаллиги борлиги аниқланган ва бу судга оид биология экспертизасининг хулосаси билан ҳам тасдиқланган бўлган.

 

Айни пайтда Бухоро вилояти прокуратураси томонидан вилоят Қон қуйиш маркази ходимлари ва бошқа шахсларга нисбатан Ўзбекистон Республикаси Жиноят кодексининг 113-моддаси, 1-қисми (Таносил ёки ОИВ касаллиги/ОИТСни тарқатиш) билан жиноят иши қўзғатилган. Ҳозирда вилоят ИИБ томонидан тергов ҳаракатлари олиб борилмоқда.