Йогурт идишига яширилган 267 грамм гиёҳвандлик моддаси аниқланди
Тошкентда гиёҳвандлик воситаларининг ноқонуний айланмасига чек қўйилди.
Тошкентда икки ҳолатда гиёҳвандлик воситалари мусодара қилинди. Божхона қўмитаси ходимлари ҳуқуқни муҳофаза қилувчи бошқа органлар билан ҳамкорликда гиёҳвандлик воситаларининг ноқонуний айланмасига қарши тезкор тадбирлар ўтказди.
Тезкор тадбирларнинг бирида олдиндан олинган маълумотлар асосида гумон остига олинган фуқаро Фарғона–Тошкент йўналишида ҳаракатланаётган автомашинада йўловчи сифатида Тошкент шаҳрига келаётгани аниқланган.
Автомашина пойтахт ҳудудига кирганидан сўнг тўхтатилиб, холислар иштирокида кўздан кечирилган. Текширув давомида фуқаронинг ёнидан икки дона йогурт идишига полиэтилен пакетга ўралган ҳолда яширилган, умумий оғирлиги 267 грамм бўлган гиёҳвандлик моддаси аниқланган. Мазкур модда белгиланган тартибда ашёвий далил сифатида олиб қўйилган.
Яна бир тезкор тадбир Тошкент шаҳар божхона бошқармасининг Контрабандага қарши курашиш бўлими ходимлари томонидан ҳуқуқни муҳофаза қилувчи бошқа идоралар билан ҳамкорликда ўтказилган.
Унда олдиндан олинган тезкор маълумотлар асосида гумон остига олинган фуқаронинг яшаш хонадони холислар иштирокида кўздан кечирилган. Натижада хонадондан 14 грамм гашиш, бир дона электрон тарози ҳамда гиёҳвандлик воситаларини истеъмол қилиш учун мўлжалланган махсус мосламалар аниқланиб, ашёвий далил сифатида олиб қўйилган.
Мазкур ҳолатлар юзасидан ҳозирда тергов ҳаракатлари олиб борилмоқда. Тергов якунларига кўра, ҳолатларга қонунчиликда белгиланган тартибда ҳуқуқий баҳо берилади.
