Эронда Трампнинг ўғлини ўлдирганлик учун 10 млн доллар мукофот ваъда қилинди
Эрон телевидениеси Баррон Трампнинг эҳтимолий манзиллари ва университетга бориш йўналиши кўрсатилган лавҳани эълон қилди.
Эрон давлат телеканали АҚШ президенти Доналд Трампнинг 20 ёшли ўғли Баррон Трамп ҳақида уч дақиқалик лавҳани эфирга узатди. Унда Барронни ўлдирганлик учун 10 миллион доллар мукофот ваъда қилинди. Бу ҳақда Bild хабар берди.
“Чаннел 3” телеканалида намойиш этилган видеода Баррон Трамп бўлиши мумкинлиги айтилган жойлар, жумладан, унинг тахминий манзиллари кўрсатилган. Шунингдек, унинг Вашингтондаги университетга бориш йўналиши ҳам қайта тасвирланган.
Лавҳада АҚШ Махфий хизмати агентлари Барронни тун-у кун қўриқлаётгани ва айрим агентлар унинг университетида талаба сифатида ниқобланиб юргани таъкидланган.
Бироқ видеодаги тасвирларнинг катта қисми сунъий интеллект ёрдамида яратилган саҳналаштирилган материаллардан иборат. Лавҳада Баррон Трампга суиқасд уюштиришга тайёргарлик кўрилаётгани ҳақидаги даъволарни тасдиқловчи ишончли далиллар келтирилмаган.
Мазкур лавҳа ҳақида хабар берган Исроил ОАВлари ҳам ундаги баёнотлар Баррон Трампга нисбатан реал таҳдид мавжудлигини тасдиқламаслигини қайд этган.
Эрон давлат ОАВлари аввал ҳам Трамп оиласи аъзоларига таҳдидлар билан боғлиқ материалларни намойиш этган. Хусусан, илгари шунга ўхшаш лавҳа АҚШнинг биринчи хоними Мелания Трампга бағишланган бўлиб, унда у одатда ташриф буюрадиган жойлар ҳақида маълумот берилган.
