Тошкентда ЙПХ талабига бўйсунмаган рақамсиз Malibu-2 ҳайдовчиси ушланди

Тошкент ҳалқа автомобиль йўлида ЙПХ ходимларининг тўхташ ишорасига бўйсунмай, ҳаракатни давом эттирган давлат рақам белгисисиз Malibu-2 ҳайдовчиси ушланди. Бу ҳақда Тошкент шаҳар ИИББ ахборот хизмати маълум қилди.

 

Маълум қилинишича, автомобиль Учқаҳрамон томондан Ҳасанбой ҳудуди томон ҳаракатланаётган вақтда ЙПХ ходимлари эътиборини тортган. Автомобилнинг давлат рақам белгиси бўлмаган, олд ён ойналари ноқонуний қорайтирилгани ҳамда орқа қисмига қўшимча антенна ўрнатилгани аниқланган.

 

ЙПХ ходимлари ҳайдовчига тўхташ ишорасини берган. Бироқ у қонуний талабга бўйсунмасдан, автомобилни кескин ортга буриб, қочишга уринган.

 

Кўрилган чоралар натижасида ҳайдовчи ва транспорт воситаси ушланган. Ҳайдовчига нисбатан маъмурий баённома расмийлаштирилиб, Малибу-2 вақтинча сақлаш учун жарима майдончасига жойлаштирилган.

 

Ҳолат билан боғлиқ видео ижтимоий тармоқларда тарқалганидан сўнг, ўзини ҳайдовчининг отаси деб таништирган шахс видеони эълон қилган фойдаланувчилардан бирига мурожаат қилган. Тарқалган аудиоёзувда эркак “ишни пул билан ҳам ҳал қила олмаётганини”, ўғлини ҳайдовчилик гувоҳномасидан маҳрум қилишмоқчилигини айтиб, видеони ўчиришни сўраган. Фойдаланувчи талабни рад этганидан сўнг эса эркак унга нисбатан ҳақоратли сўзлар ишлатиб, манзилига бориш билан таҳдид қилган.

 

Ҳолат юзасидан тегишли тартибда чора кўрилгани маълум қилинди.