Сурхондарёда ИИБга тегишли "автозак" Некcия билан тўқнашди
Икки киши ҳалок бўлган, яна бир киши оғир тан жароҳатлари билан шифохонага ётқизилган.
Сурхондарё вилояти Денов туманида ИИБга қарашли автозак ва фуқаролардан бирига тегишли Некция тўқнашиши оқибатида икки киши ҳалок бўлган.
Вилоят ИИБ ЙҲХБ ахборот хизматининг хабар беришича, ҳодиса 2024 йил 19 январ соат 20:00 ларда содир бўлган.
Денов тумани Водий маҳалласи ҳудудидан ўтувчи “4Р 108 В” автомобиль йўлининг 3-километрида 50 ёшли ҳайдовчи Некция машинасини бошқариб келаётиб, йўлни кесиб ўтаётган пиёдани уриб юборган. Сўнг бошқарувни йўқотиб қарама-қарши йўналишдан келаётган Сурхондарё вилояти ИИБ хўжалик бўлимига тегишли “ГАЗон Некст” русумли "автозак" махсус транспорт воситасининг йўналишига чиқиб кетиб, у билан тўқнашган.
Ҳодиса оқибатида Некция уриб юборган 41 ёшли пиёда оғир тан жароҳатлари билан шифохонага ётқизилган. Некция ҳайдовчиси ва бир нафар йўловчиси шифохонада вафот этган. Қайд этилишича, ҳозирда ҳолат юзасидан Денов туман прокуратураси томонидан тергов ҳаракатлари олиб борилмоқда.
