Эндиликда қамоққа олинганлар мажбурий тиббий кўрикдан ўтказилади
Қонунчиликка тегишли ўзгартиришлар киритилмоқда.
Ўзбекистон қонунчилигига киритилган янги ўзгартиришларга кўра, эндиликда қўлга олинган шахслар тергов ҳибсхонасига жойлаштирилишидан аввал мажбурий тиббий кўрикдан ўтказилади. Бу ҳақда тегишли қонун ҳужжатларига киритилган ўзгартиришларга асосланиб хабар берилди.
Қонунчиликка “Жиноий процессуал ҳаракатлар вақтида қамоқда сақлаш тўғрисида”ги Қонунга киритилган қўшимчага мувофиқ, қўлга олинган шахслар тергов ҳибсхонасига келтирилганидан сўнг 2 соат ичида тиббий кўрикдан ўтиши лозим.
Тиббий кўрик тергов ҳибсхонасининг ўзида ўтказилади ва зарурат туғилганда, ушланган шахснинг розилиги билан кўрикда уларнинг адвокати ҳам қатнашиши мумкин.
Кўрик натижалари бўйича белгиланган шаклдаги расмий тиббий хулоса расмийлаштирилади. Агар кўрик давомида маҳбус танасида жароҳат, шикастланиш ёки бошқа зўравонлик излари аниқланса, бу ҳолатлар алоҳида тартибда ҳужжатлаштирилади, маҳбусга бу ҳақида расмий равишда хабар берилади ва ҳолат зудлик билан прокурорга етказилади.
Мазкур ўзгартиришнинг асосий мақсади — ҳибсга олинганларга нисбатан қийноқлар ва инсон ҳуқуқлари бузилишининг олдини олишдан иборат.
