18 млн дан ортиқ фирибгарлик операцияси: банкларда 461 млрд сўмлик маблағ чиқиб кетишининг олди олинди
Банклардаги антифрод тизимларининг 6 ойлик натижалари эълон қилинди.
Ўзбекистонда 2026 йилнинг биринчи ярмида тижорат банкларида қиймати 461 миллиард сўмдан ортиқ бўлган 18 миллиондан зиёд фирибгарлик операциясининг олди олинди. Бу ҳақда Марказий банк маълум қилди.
Маълум қилинишича, Президентнинг ПҚ-381-сон қарорига мувофиқ, тижорат банкларида мижозлар маблағлари ва мобил қурилмаларини турли рақамли хавфлардан ҳимоя қилишга қаратилган Session антифрод ҳамда антивирус тизимлари жорий этилган.
Session антифрод тизими банк операцияларини хавф даражасига кўра таҳлил қилади. Юқори хавфли деб баҳоланган операциялар автоматик тарзда чекланиб, шубҳали транзакциялар орқали маблағларнинг чиқиб кетиш хавфини камайтиради.
2026 йилнинг дастлабки олти ойида мазкур тизимлар орқали 18 миллиондан ортиқ фирибгарлик операциясининг олди олинган. Ушбу операцияларнинг умумий қиймати 461 миллиард сўмдан ошган.
Фирибгарлик ҳолатларининг олдини олиш бўйича энг юқори кўрсаткич “Халқ банки”да қайд этилган — 2,2 миллионта. “Ипак йўли банки”да эса 1,4 миллиондан ортиқ шундай ҳолатларнинг олди олинган. “Ҳамкорбанк” ва “Миллий банк”да ҳам ярим йил давомида 100 мингдан ортиқ фирибгарлик операцияси чекланган.
Шунингдек, тижорат банкларининг мобил иловаларида зарарли дастурларни аниқловчи антивирус тизимлари ҳам ишламоқда. Улар қурилмалардаги зарарли .apk файллар ва дастурларни аниқлаш орқали мобил банк хизматларидан хавфсиз фойдаланишга кўмаклашади.
Олти ой давомида антивирус тизимлари ёрдамида 1,29 миллионта қурилмага кириш чекланган, қарийб 2 миллионта қурилма эса зарарли дастурлардан тозаланган.
Марказий банкка кўра, ушбу ҳимоя механизмлари фирибгарлик хавфини эрта аниқлаш, шубҳали операцияларни ўз вақтида чеклаш ҳамда банк мижозларининг маблағлари ва мобил қурилмаларини ҳимоя қилишга хизмат қилмоқда.
