Фарғонада салкам 8 млн сўмлик дори ёқиб юборилди
Улар ноқонуний савдодан олингани аниқланган.
Фарғона вилоятида салкам 8 млн сўмлик ноқонуний дори-дармонлар ёқиб йўқ қилинди. Бу ҳақида Мажбурий ижро бюроси хабар бермоқда.
Қайд этилишича, Ёзёвон туман Мажбурий ижро бюросига Жиноят ишлари бўйича Қўштепа туман судининг ҳукми асосида ижро варақаси келиб тушган. Унда қарздор М.Қ.дан далилий ашё сифатида олинган жами 7 миллион 809 минг сўмлик 182 турдаги тиббий дори-дармонларни йўқ қилиш кўрсатилган.
Мажбурий ижро бюроси ходимлари томонидан ижро иши тезкорлик билан қўзғатилиб, Вазирлар Маҳкамасининг қарори талабларига мувофиқ, барча дори-дармонлар тегишли тартибда ёқиб юборилган. Бу ҳаракат ноқонуний савдодан олинган дори-дармонларнинг аҳоли саломатлиги учун хавф туғдирмаслигини таъминлаш мақсадида амалга оширилган.
