Ўзбекистон Миллий гвардияси снайперлари халқаро турнирда биринчи ўринни эгаллади
Халқаро мусобақада 25 давлатдан 45 та жамоа иштирок этган.
Хитойнинг Урумчи шаҳрида ўтказилган “Ўткир тиғ–2025” халқаро снайперлар турнирида Ўзбекистон Миллий гвардияси терма жамоаси мутлақ ғолибликни қўлга киритди. Мусобақада 25 давлатдан келган 45 та жамоа иштирок этди.
Ўзбекистонлик снайперлар Россия, Жанубий Корея, Ветнам, Беларус, Куба, Ливия ва бошқа давлатларнинг жамоаларини ортда қолдириб, биринчи ўринни эгаллашди. Ҳарбийлар энг мураккаб шароитларда ўз маҳоратини кўрсатиб, юқори аниқлик ва тезкорликда рақибларидан устун чиқди.
Мусобақа давомида Ўзбекистон Миллий гвардияси снайперлари жами 8 та медални қўлга киритди. Бу ғалаба уларнинг профессионал тайёргарлиги ва халқаро майдондаги ҳарбий салоҳиятини яна бир бор исботлади.
Мазкур ютуқ Ўзбекистон ҳарбийлари учун катта натижа бўлиб, мамлакатнинг халқаро ҳарбий спорт мусобақаларидаги нуфузини янада оширади.
