ДХХ раиси Кобулда Толибон расмийлари билан учрашув ўтказди
Учрашувлар давомида Ўзбекистон-Афғонистон чегарасида хавфсизликни мустаҳкамлаш масалалари муҳокама қилинди.
2025 йил 22 июль куни Ўзбекистон Республикаси Давлат хавфсизлик хизмати раиси Баҳодир Қурбонов бошчилигидаги делегация Кобул шаҳрига ташриф буюрди. Ташриф давомида Қурбонов Афғонистон Разведка хизмати раиси Абдул Ҳақ Восиқ, Мудофаа вазири Мулло Муҳаммад Ёқуб ҳамда Ички ишлар вазири Сирожиддин Ҳаққоний билан учрашувлар ўтказди.
Музокараларда минтақавий тинчлик ва барқарорликни таъминлаш, Афғонистонни халқаро ҳамжамиятга тўлақонли қўшиш борасидаги саъй-ҳаракатлар муҳокама қилинди. Жумладан, Президент Шавкат Мирзиёевнинг БМТ, ШҲТ ва бошқа халқаро майдонлардаги чиқишларида Афғонистон бўйича билдирган очиқ ва конструктив позицияси алоҳида таъкидланди.
Икки мамлакат ўртасидаги қишлоқ хўжалиги, ирригация, энергетика, транспорт, савдо ва бошқа йўналишлардаги ҳамкорлик муҳим мавзу сифатида кўтарилди. Шунингдек, Ўзбекистон томонидан Афғонистонда иқтисодий ва инфратузилмавий лойиҳаларни амалга ошириш, инсонпарварлик ёрдамини давом эттириш ташаббуслари эътироф этилди.
Учрашувлар давомида Ўзбекистон-Афғонистон чегарасида хавфсизликни мустаҳкамлаш, кириш-чиқиш тартибини соддалаштириш, гиёҳвандлик моддалари ноқонуний айланиши ва терроризмга қарши кураш соҳасида ҳамкорликни кучайтириш масалалари ҳам муҳокама қилинди. Мазкур мулоқотлар икки давлат ўртасидаги дўстона ва яқин қўшничилик алоқаларини мустаҳкамлашга хизмат қилиши кутилмоқда.
