Шаҳноза Мирзиёева Халқаро сузиш федерацияси бюроси аъзолигига сайланди
Сингапурда Бутунжаҳон сузиш федерациясининг навбатдаги Конгресси бўлиб ўтди.
29-июль куни Сингапурда бўлиб ўтган Халқаро сузиш федерацияси — World Aquatics Конгрессида Ўзбекистон Паралимпия қўмитаси раиси ўринбосари Шаҳноза Мирзиёева ташкилотнинг Бюро аъзолигига сайланди. Бу нуфузли лавозим Ўзбекистон вакили учун спорт дипломатиясида муҳим қадамлардан бири сифатида баҳоланмоқда.
«Мен учун бу ташкилотнинг бир қисми бўлиш ва Ўзбекистон манфаатларини глобал даражада илгари суриш катта масъулиятдир», — деди Мирзиёева ўзининг ижтимоий тармоқдаги саҳифасида. У, шунингдек, бу ютуқни спортни ҳамма учун очиқ қилиш йўлида меҳнат қилаётган жамоасининг муваффақияти деб атади.
Шаҳноза Мирзиёева ушбу лавозим орқали сув спорт турларини ривожлантиришга янада кўпроқ эътибор қаратилишини таъкидлади. Унинг фикрича, World Aquatics доирасидаги спорт турлари оммавийлигини ошириш ва ўзбек спортчиларининг халқаро майдонларда фаол иштирокини кучайтириш муҳим вазифа бўлиб қолади.
Маълумот учун, Мирзиёева айни пайтда Ўзбекистон Паралимпия қўмитаси раиси ўринбосари лавозимидан ташқари, Ижтимоий ҳимоя миллий агентлиги директорининг биринчи ўринбосари сифатида ҳам фаолият юритмоқда.
