Ўзбекистонда фуқаролар ўз номларига нечта банк карта ва СИМ-карта рўйхатдан ўтганлигини текширишлари мумкин бўлади
Шубҳали карталар ва рақамларни масофадан блоклаш хизмати жорий этилади.
2026 йил декабрига қадар Ўзбекистонда фуқароларнинг молиявий ва телекоммуникация активларини ягона платформа орқали назорат қилиш имконини берувчи янги тизим жорий этилиши режалаштирилмоқда. Мазкур хизмат Ягона интерактив давлат хизматлари портали (my.gov.uz) орқали ишга туширилади.
Янги функцияга мувофиқ, фойдаланувчилар ўз номига расмийлаштирилган барча банк карталари ҳамда мобил алоқа рақамларини онлайн тарзда кўриш имкониятига эга бўлади. Тизим паспорт маълумотлари асосида миллий ва халқаро тўлов тизимлари орқали очилган банк карталарининг умумий сонини тезкор аниқлаш имконини тақдим этади.
Шунингдек, портал орқали турли мобил операторлар тармоғида рўйхатдан ўтган фаол СИМ-карталар ҳақида батафсил маълумот олиш мумкин бўлади. Агар фойдаланилмаётган ёки шубҳали ҳисоблар аниқланса, фуқаролар уларни масофадан туриб блоклаш ёки ёпиш бўйича ариза юбориш ҳуқуқига эга бўлади. Бу эса банк ёки мобил оператор офисига шахсан мурожаат қилиш заруратини сезиларли даражада камайтиради.
Мазкур хизмат Ягона давлат ахборот тизими доирасида ишга туширилиши кўзда тутилган бўлиб, банклар ва мобил операторларнинг ахборот тизимлари билан хавфсиз интеграция таъминланади. Маълумотлар реал вақт режимида янгиланиб боради.
Мазкур ташаббус фуқароларнинг шахсий маълумотлари хавфсизлигини мустаҳкамлаш, молиявий фирибгарликларнинг олдини олиш ҳамда рақамли хизматлардан фойдаланиш қулайлигини оширишга қаратилган.
