"Ҳозир "А полосалар" ишламаяпти, иккита муаммо бор" — ҳоким ўринбосари
Тошкент шаҳар ҳокимининг транспорт ва йўл инфратузилмаси бўйича ўринбосари “А” тасмали айрим йўлларда тест режимида камера кузатуви йўлга қўйилишини айтди. Бахтиевнинг сўзларига кўра, шу пайтгача йўлаклар "гост" талабларига мослаштирилган. “Тайёргарлик кўрилди, ҳамма иш амалга оширилди. Ҳозир қонунчилик даражасида фиксация қилиш имконияти бор. “Запуск” қилсак бўлди”, — деди у.
12 март куни Тошкент шаҳар ҳокимлигида Йўл ҳаракатини ташкил этиш маркази (ЙҲТЭМ) фаолияти юзасидан матбуот анжумани бўлиб ўтди. Масъулларнинг қайд этишича, марказнинг “долзарб 90 кун” дастурида кўчаларнинг 347 км қисмида “А” тасмали йўлаклар ташкил этиш режаси ҳам бор. Бироқ ҳозиргача ташкил этилган автобус йўлаклари кутилганидек ишламаяпти, қоидабузарликлар қайд этилмаяпти. Тошкент шаҳар ҳоким ўринбосари Абдураҳмон Бахтиев шу каби масалаларга аниқлик киритди. Унинг айтишича, битта камера ўрнатиш билан иш битмайди.
“Ҳозир биз тест режимида 1-2 та кўчаларда кузатув камераларини ишга туширамиз. Санасини аниқ эслай олмайман, кеча муҳокама қилингандик. Авваламбор, шу 100 км йўлни танлаб олганмиз, шундан тахминан 60-70 фоизи “А” полоса, “выделенная полоса” дейилади, шуни йўлакларга ажратмоқчимиз. Албатта, шу йўлаклар ишлаши учун уларни ГОСТ талабларига тўғрилаб қўймоқчимиз. У ерда маҳалладан чиқиш жойлари бор, кириш жойлари бор. Биринчи, ўша жойларни тўғирлаб, полосасини норматив даражасига олиб келиш керак, иккинчи масала — кўп жойларда камералар қўйилган. Ички ишлар тизими билан ҳамкорликда локациялар белгиланмоқда. Ҳар битта ўша полосада камера кузатувини ташкиллаштирамиз. Ҳозир биринчи навбатда тест режимида яна битта-иккита кўчани қилиб кўрмоқчимиз. Уни ўрнатиш жараёни бор, серверларга улаш масаласи бор. Жуда кўп техник масала бор-да. Фақат камерани ўрнатиб қўйсангиз, иш битмайди. Менинг маълумотим бўйича тайёргарлик кўрилди, ҳамма иш амалга оширилди. Ҳозир қонунчилик даражасида фиксация қилиш имконияти бор, “запуск” қилсак бўлди”, — дейди Бахтиев.
Ҳоким ўринбосари айрим кўчаларда жамоат транспорти йўлаклари ишламаётганини 2 та асосий сабаб билан изоҳлади.
“Ҳозирги “А” полосалар айрим жойларда яхши ишлаяпти, айрим жойларда ишламаяпти. Унинг сабаби иккита асосий сабаби бор: биринчиси, ГОСТ нормативларига тўғри келмайди, дейлик, маҳалладан чиққанда машина автобусга халақит бериб қоляпти. Иккинчиси, шу бизнинг енгил машиналаримиз зарурат бўлганда тезроқ юриб кетаман деб йўлакка тушиб олиш ҳолатлари бор. Шу иккита масалани ечсак, полоса ишлаб кетади”,- дейди у.
Эслатиб ўтамиз, 2025 йил мартида Сенатда автобус йўлагига кирган ҳайдовчиларга жазо масаласи кўриб чиқилган эди. Унда йўналишли транспорт воситалари учун алоҳида ажратилган тасмаси бор йўлдан транспорт воситаларининг ҳаракатланиши — базавий ҳисоблаш миқдорининг бир баравари миқдорида, худди шундай ҳуқуқбузарликни маъмурий жазо қўлланилганидан кейин бир йил давомида такроран содир этилса – БҲМнинг уч баравари миқдорида (1 млн 125 минг сўм) жарима солишга сабаб бўлиши айтилганди.
