Бир қатор вазирликларнинг мурожаатларнинг ярмидан кўпига фақат юзаки жавоб бераётгани танқид қилинди

Президент раислигида ўтказилаётган видеоселектор йиғилишида фуқаролар мурожаатлари билан ишлаш самарадорлиги танқидий таҳлил қилинди.

 

Йиғилишда айрим вазирлик ва идораларда мурожаатлар бўйича амалий ечим бериш ўрнига юзаки жавоблар билан чекланилаётгани қайд этилди. Хусусан, Олий таълим, фан ва инновациялар вазирлиги мурожаатларнинг 64 фоизига, Қурилиш ва уй-жой коммунал хўжалиги соҳасида назорат қилиш инспекцияси 61 фоизига, Транспорт вазирлиги эса 58 фоизига мазмунан ечим бермаган ҳолда жавоб қайтаргани айтилди. Бундай ҳолатлар бошқа вазирликларда ҳам учраётгани таъкидланди.

 

Шунингдек, Халқ қабулхоналари ташкил этилган илк йилларда мурожаатларнинг 90–95 фоизи шикоят шаклида бўлган бўлса, ҳозир бу кўрсаткич 60–65 фоизгача камайгани билдирилди. Қайд этилишича, фуқаролар тобора шахсий муаммолар эмас, балки маҳаллалардаги шароитларни яхшилашга доир таклифлар билан мурожаат қилмоқда.

 

Шу билан бирга, муаммоси ҳал этилмаган айрим фуқаролар раҳбарлар қабулини ташкил этиб беришни Президентдан сўраб мурожаат қилаётгани ҳам айтилди.

 

Давлат раҳбари бундан буён ҳокимлар фақат аризада кўтарилган масалани ҳал қилиш билан чекланмасдан, муаммонинг келиб чиқиш сабабларини ҳам бартараф этиши зарурлигини таъкидлади.

 

Йиғилишда Халқ қабулхоналари фаолиятини янгича тизим асосида ташкил этиш белгиланди. Унга кўра, қабулхоналар энди фақат мурожаатларни қабул қилувчи орган эмас, балки ҳудудлардаги муаммоларни аниқлаб, таҳлил қиладиган диагностика маркази сифатида фаолият юритади.