Сув тежайдиган суғориш тизимлари учун 50 фоизгача субсидия ажратилади
Мазкур субсидия маҳсулот ва технология туридан қатъи назар ҳар бир контур учун фақат бир марта берилади.
Ҳукуматнинг 2026 йил 28 апрелдаги 206-сон қарори билан “Қишлоқ хўжалиги маҳсулотларини етиштирувчиларнинг сувни тежайдиган суғориш технологияларини жорий этиш бўйича харажатларининг бир қисмини қоплаш тартиби тўғрисида”ги низом тасдиқланди. Бу ҳақда Адлия вазирлиги хабар берди.
Унга мувофиқ, қишлоқ хўжалиги маҳсулотларини етиштирувчиларга сувни тежайдиган суғориш технологияларини жорий этиш билан боғлиқ харажатлар учун давлат бюджетидан субсидия ажратилади. Мазкур субсидия ҳар бир контур учун фақат бир маротаба, маҳсулот тури ва технология туридан қатъи назар тақдим этилади.
Субсидия олиш учун талабгорлар ўзларига тегишли экин ер майдонлари ҳақидаги маълумотларни контурлар ва қишлоқ хўжалиги маҳсулотлари турлари кесимида белгиланган тартибда Агропортал тизимига киритиши лозим. Шундан сўнг, ариза электрон шаклда мазкур тизим орқали юборилади.
Аризага сувни тежайдиган суғориш технологиясини қуриш бўйича «Томчи-реэстр»га киритилган пудрат ташкилоти билан тузилган шартнома нусхаси, лойиҳа ҳужжатлари ҳамда ишлар якунланганини тасдиқловчи далолатнома, шунингдек амалга оширилган ишлар бўйича контур маълумотлари (ҳудуди ва жойлашуви аниқ кўрсатилган ҳолда) илова қилинади.
Шунингдек, сувни тежайдиган суғориш технологияларини ўз маблағи ҳисобидан жорий этган талабгорларга субсидия миқдорининг 50 фоизи олдиндан тўлаб берилиши белгиланган.
