Ҳарбий хизматчиларга йилига бир марталик 100 БҲМгача моддий ёрдам берилади

 

Олий Мажлис Қонунчилик палатасининг навбатдаги ялпи мажлисида “Ҳарбий хизматчиларнинг мақоми ва уларнинг ижтимоий ҳимояси тўғрисида”ги қонун лойиҳаси биринчи ўқишда кўриб чиқилди.

Мазкур қонун лойиҳаси ҳарбий хизматчиларнинг ҳуқуқлари, имтиёзлари, кафолатлари ва мажбуриятларини комплекс тарзда тартибга солишга қаратилган бўлиб, Ўзбекистон Қуролли Кучлари таркибига кирувчи вазирлик ва идоралар ҳарбий хизматчиларининг ҳуқуқий мақомини аниқ белгилашни назарда тутади.

Ҳужжатда ҳарбий хизматчиларнинг ҳуқуқ ва мажбуриятлари, хизмат интизоми, масъулияти ҳамда ижтимоий ва ҳуқуқий ҳимоя механизмлари, шунингдек, уларнинг оила аъзолари учун кафолатлар мустаҳкамланмоқда.

Қонун лойиҳасига мувофиқ, моддий таъминот, сифатли тиббий хизмат, уй-жой билан таъминлаш, мажбурий давлат суғуртаси, пенсия таъминоти ҳамда хизмат вазифасини бажариш чоғида жароҳат олиш ёки ҳалок бўлиш ҳолатларида компенсация тўлаш каби муҳим ижтимоий кафолатлар қонун даражасида мустаҳкамланади.

Шунингдек, камида 20 йиллик хизмат стажига эга бўлган ва ҳарбий хизматдан бўшатилган ҳарбий хизматчилар учун йилига бир марта имтиёзли асосда санаторий-курорт муассасаларига йўлланма бериш тартиби жорий этилиши режалаштирилмоқда. Бунда йўлланма қийматининг 75 фоизи давлат бюджети ҳисобидан қопланади.

Бундан ташқари, қонун лойиҳасида ҳарбий хизматчиларга йилига бир марта 100 базавий ҳисоблаш миқдоригача моддий ёрдам кўрсатиш механизми ҳам назарда тутилган.

Муҳокамалар давомида депутатлар ушбу ҳужжат ҳарбий хизмат нуфузини ошириш, Ватан ҳимоячиларининг ижтимоий ҳимоясини кучайтириш ҳамда уларнинг оила аъзолари учун ишончли кафолатлар яратишда муҳим аҳамият касб этишини таъкидладилар.

Муҳокамалар якунида қонун лойиҳаси депутатлар томонидан биринчи ўқишда қабул қилинди.