Президент Шавкат Мирзиёев киберхавфсизлик бўйича Туркий альянс ташкил этишни таклиф қилди

Шавкат Мирзиёев Туркистон шаҳрида бўлиб ўтган Туркий давлатлар ташкилоти норасмий саммитида нутқ сўзлаб, туркий дунё интеграциясини мустаҳкамлаш, сунъий интеллект ва рақамли ривожланиш соҳаларида ҳамкорликни кенгайтириш бўйича қатор муҳим ташаббусларни илгари сурди.

 

Давлат раҳбари саммит мезбони — Қосим-Жомарт Тўқаевга анжуман юқори савияда ташкил этилгани учун миннатдорлик билдириб, Туркистон шаҳри туркий халқлар бирдамлиги ва муштарак қадриятларининг ёрқин тимсоли эканини таъкидлади.

 

Нутқда бугунги мураккаб геосиёсий шароитда туркий давлатлар ўртасидаги интеграция стратегик аҳамият касб этаётгани қайд этилди. Сўнгги йилларда Туркий давлатлар ташкилотининг иқтисодий ва институционал салоҳияти сезиларли даражада мустаҳкамлангани, ташкилот мамлакатларининг умумий иқтисодий ҳажми 2,4 триллион доллардан ошгани алоҳида таъкидланди.

 

Президент сунъий интеллект соҳасида стратегик ҳамкорлик тармоғини яратиш, “Рақамли туркий коридор” концепциясини ишлаб чиқиш ҳамда Тошкентда Технологиялар форумин ўтказишни таклиф этди. Шунингдек, дата марказларини ўзаро боғлаш, булутли ва квант технологияларини ривожлантириш масалаларига эътибор қаратилди.

 

Таълим ва илм-фан йўналишида эса Ислом цивилизацияси маркази базасида тарихий-маданий меросни ягона “катта маълумотлар” платформасига жамлаш ташаббуси илгари сурилди. Ёшларни замонавий касбларга тайёрлаш мақсадида амалга оширилаётган “5 миллион сунъий интеллект етакчилари” дастури ҳақида ҳам маълумот берилди.

 

Нутқда транспорт ва логистика тизимларини рақамлаштириш, экологик хавфларни сунъий йўлдош орқали мониторинг қилиш, киберхавфсизлик бўйича Туркий альянс ташкил этиш каби масалалар ҳам илгари сурилди.

 

Саммит якунида Туркистон декларациясини қабул қилиш режалаштирилгани қайд этилди.