Шавкат Мирзиёев Филиппин президентига таъзия йўллади
Ўзбекистон Президенти зилзила қурбонларининг оила аъзолари ва яқинларига ҳамдардлик билдириб, жароҳатланганларнинг тезроқ соғайиб кетишини тилади.
Шавкат Мирзиёев Филиппиннинг жанубий ҳудудларида юз берган кучли зилзила оқибатида кўплаб инсонларнинг ҳалок бўлгани ва жароҳат олгани муносабати билан Фердинанд Маркосга таъзия йўллади. Бу ҳақда Президент матбуот хизмати маълум қилди.
Шавкат Мирзиёев Филиппиннинг Минданао ороли жанубий соҳилларида содир бўлган табиий офат оқибатида ҳалок бўлганларнинг оила аъзолари ва яқинларига самимий ҳамдардлик изҳор этиб, жабрланганларнинг тез фурсатда соғайиб кетишини тилаган.
Эслатиб ўтамиз, 8 июн куни Филиппин қирғоқлари яқинида юз берган кучли зилзила оқибатида 32 киши ҳалок бўлган, яна 134 нафар фуқаро турли даражадаги тан жароҳатлари олган эди. Табиий офат сабаб ҳудудда қутқарув ва тиклаш ишлари давом этмоқда.
