Кўксаройда Ўзбекистон ва Германия етакчилари музокаралар ўтказди

Кўксарой қароргоҳида Ўзбекистон Президенти ва Германия Президентининг тор доирада ҳамда расмий делегациялар иштирокидаги музокаралари бўлиб ўтди.

 

Учрашувда Ўзбекистон – Германия ҳамкорлигини янада ривожлантириш, сиёсий мулоқотни мустаҳкамлаш, савдо-иқтисодий алоқалар ва маданий-гуманитар соҳадаги ҳамкорликни кенгайтириш масалалари атрофлича кўриб чиқилди.

 

Давлат раҳбари Германия Президентининг Ўзбекистон ва Европа Иттифоқи, шунингдек Марказий Осиё давлатлари билан муносабатларни ривожлантиришга қўшган шахсий ҳиссасини алоҳида қайд этди.

 

Томонлар ўртасидаги сиёсий мулоқот фаоллашгани ва ҳамкорлик изчил ривожланиб бораётгани мамнуният билан таъкидланди. Савдо-иқтисодий соҳада ижобий динамикалар кузатилиб, ўзаро товар айирбошлаш ҳажми ортиб бормоқда. Ўтган йил якунига кўра, ўзаро товар айирбошлаш ҳажми 1,4 миллиард доллардан ошиб, жорий йилнинг ўтган даврида яна 5 фоизга кўпайди. Германиянинг Ўзбекистон иқтисодиётига киритган инвестициялари ҳажми 2025 йилда 2 миллиард долларга етди.

 

Маданий-гуманитар соҳада ҳамкорлик янада мустаҳкамланиб, таълим йўналишида муҳим лойиҳалар амалга оширилмоқда. Бугунги кунда Ўзбекистонда 400 мингдан зиёд ёшлар немис тилини ўрганмоқда, 2 мингдан ортиқ талабалар Германиянинг етакчи университетларида таҳсил олмоқда. Самарқандда Ўзбекистон–Германия амалий фанлар университетини ташкил этиш бўйича битим имзоланиши икки томонлама алоқаларнинг янги босқичини бошлаб берди.

 

Шунингдек, саноат, энергетика, “яшил иқтисодиёт”, транспорт ва логистика, фармацевтика ҳамда қишлоқ хўжалиги каби йўналишларда ҳамкорликни кенгайтириш истиқболлари муҳокама қилинди.

 

Музокаралар якунида томонлар минтақавий ва халқаро долзарб масалалар юзасидан фикр алмашиб, кўп томонлама платформалар, жумладан “Марказий Осиё – Германия” формати доирасидаги ҳамкорликни янада ривожлантиришга тайёр эканликларини билдирдилар.