Португалия Ўзбекистонни енгишига ишонмайман — Паулу Барбоса
Португалиялик футбол агенти Паулу Барбоса Ўзбекистон МТЖ Конго терма жамоасидан кучлироқ эканини билдирди.
Жаҳон чемпионатининг “К” гуруҳидан ўрин олган Колумбия, Португалия, Конго Демократик Республикаси ва Ўзбекистон миллий терма жамоалари иккинчи тур учрашувларига тайёргарлик кўрмоқда.
Гуруҳнинг илк турида Колумбия Ўзбекистонни 3:1 ҳисобида мағлуб этган бўлса, Португалия кутилмаганда Конго билан 1:1 ҳисобида дуранг ўйнади.
Биринчи тур якунларидан сўнг португалиялик футбол агенти Паулу Барбоса Португалиянинг Ўзбекистонга қарши бўладиган учрашуви олдидан ўз фикрларини билдирди.
Унинг таъкидлашича, 41 ёшли Криштинау Роналду учун бутун учрашув давомида майдонда ҳаракат қилиш қийин бўлиб қолмоқда. Барбоса Конго билан ўйинда бу ҳолат яққол кўринганини айтиб, Португалия бош мураббийи Роберто Мартинезнинг Роналдуни асосий таркибда майдонга тушириш қарорини нотўғри деб баҳолади.
Агентнинг фикрича, Роналду биринчи учрашувда кутилган натижани кўрсата олмагани сабабли Ўзбекистонга қарши баҳсни захира ўриндиғида бошлаши мумкин.
Шунингдек, Барбоса Конго билан ўйиндан кейин Португалия терма жамоасининг гуруҳдаги қолган икки учрашувдаги имкониятларига ҳам шубҳа билан қараётганини билдирди.
“Биринчи ўйинга қараб баҳо берадиган бўлсам, Португалияга ишончим йўқ. Ўзбекистоннинг Колумбияга қарши ўйинини ҳам кўрдим. Менимча, Ўзбекистон Конгодан кучлироқ. Колумбия ҳақида эса ортиқча гапиришнинг ҳожати йўқ”, — деди у.
Эслатиб ўтамиз, Ўзбекистон ва Португалия терма жамоалари ўртасидаги учрашув 23 июнь куни АҚШнинг Ҳюстон шаҳридаги “Ҳюстон” стадионида бўлиб ўтади. Баҳс Тошкент вақти билан соат 22:00 да бошланади.
