Энди фирибгарлик ва талон-торож учун зарар қопланмаса, шартли озодлик қўлланилмайди
Ўзбекистонда коррупцияга оид жиноятларнинг аниқ рўйхати тасдиқланди.
Ўзбекистон Республикасининг 2026 йил 22 июндаги ЎРҚ–1155-сон Қонуни билан айрим қонун ҳужжатларига қўшимча ва ўзгартиришлар киритилди ҳамда коррупцияга оид жиноятларнинг аниқ рўйхати белгиланди. Бу ҳақда Адлия вазирлиги хабар берди.
Жиноят кодексига киритилган қўшимчаларга кўра, 167-модда 3-қисми «д» банди, 168-модда 4-қисми «г» банди, 192-9, 192-10-моддалари, 192-11-модда 2-қисми «в» банди, 205-модда 2-қисми «в» банди, 206-модда 2-қисми «в» банди, 208-модда 2-қисми, 209-модда 2-қисми «в» банди, шунингдек, 210, 211, 212, 213, 214, 214-1, 214-2-моддалари ҳамда 301-модда 2-қисми «б» бандида назарда тутилган жиноятлар коррупцияга оид жиноятлар сифатида белгиланди.
Бундан ташқари, Жиноят кодексининг 243-моддасида назарда тутилган жиноий фаолиятдан олинган даромадларни легаллаштириш билан боғлиқ қилмишлар, агар улар коррупцияга оид жиноятлар натижасида олинган маблағлар билан боғлиқ бўлса, коррупцияга оид жиноятлар тоифасига киритилади.
Қонунга мувофиқ, ўзлаштириш ёки растрата йўли билан талон-торож қилиш ҳамда фирибгарлик учун ҳукм қилинган ва содир этган жинояти оқибатида етказилган зарарни тўлиқ қопламаган шахсларга нисбатан жазодан муддатидан илгари шартли равишда озод қилиш тартиби қўлланилмайди.
Шунингдек, Маъмурий жавобгарлик тўғрисидаги кодексга киритилган ўзгартиришларга кўра, давлат харидлари предметининг бошланғич нархи билан унинг ўртача бозор нархи ўртасидаги йўл қўйиладиган энг юқори тафовутга оид талабларни бузган мансабдор шахсларга базавий ҳисоблаш миқдорининг 30 бараваригача миқдорда жарима қўлланилиши белгиланди.
Бундан ташқари, “Коррупцияга қарши курашиш тўғрисида”ги Қонунга киритилган қўшимчаларга асосан Қорақалпоғистон Республикаси, вилоятлар ва Тошкент шаҳрида коррупцияга қарши курашиш бўйича ҳудудий кенгашлар ташкил этилади. Давлат органлари ва ташкилотларида эса комплаэнс ва коррупцияга қарши ички назорат тузилмалари фаолияти йўлга қўйилади.
Мазкур қонун расмий эълон қилинган кундан эътиборан кучга киради.
