“Португалияга қарши ўз режамиз бор” — Фабио Каннаваро
Ўзбекистон бош мураббийи Португалия фақат Криштиану Роналдудан иборат эмаслигини, жамоа кучли рақибдан қўрқмаслигини ва ижобий натижа учун охиригача курашишини айтди.
Ўзбекистон миллий терма жамоаси бош мураббийи Фабио Каннаваро ЖЧ—2026 гуруҳ босқичи доирасида Португалияга қарши бўлиб ўтадиган ҳал қилувчи учрашув олдидан ташкил этилган расмий матбуот анжуманида иштирок этди. Унда италиялик мутахассис рақибнинг кучли жиҳатлари, жамоанинг тайёргарлиги ва ўйин учун танланган стратегия ҳақида ўз фикрлари билан ўртоқлашди.
Каннаваро Португалия терма жамоаси жаҳон чемпионатидаги энг кучли жамоалардан бири эканини таъкидлаб, рақибни фақат Криштиану Роналду билан боғлаш нотўғри эканини қайд этди.
“Португалия жуда кучли жамоа. Уларнинг қанотларда юқори савияли футболчилари бор, ярим ҳимоя чизиғи эса дунёнинг энг кучли чизиқларидан бири ҳисобланади. Шунингдек, футбол тарихидаги энг буюк футболчилардан бири ҳам шу жамоа сафида тўп суради. Бироқ биз фақат Роналдуни эмас, бутун Португалия жамоасини ҳисобга олган ҳолда тайёргарлик кўрдик. Уларнинг асосий таркибида ҳам, захирасида ҳам юқори даражадаги футболчилар кўп. Шу билан бирга, Роналдуни бир сонияга ҳам назоратсиз қолдириб бўлмайди. У стандарт вазиятларда ҳам, ўйин давомида ҳам исталган пайт гол уриши мумкин”, — деди мутахассис.
Бош мураббий мураббийлар штаби Португалия терма жамоасининг ўйин услубини батафсил ўрганганини ва жамоа бўлажак баҳс учун ўз стратегиясини ишлаб чиққанини маълум қилди.
“Биз Португалиянинг футбол фалсафасини таҳлил қилдик. Улар тўп назорати орқали ўйинни бошқаришни яхши кўради ва одатда учрашувни юқори босим билан бошлашга ҳаракат қилади. Улар имкон қадар тезроқ ўйин тақдирини ҳал қилишни исташади. Шундан келиб чиқиб, биз ҳам керакли тайёргарликни кўрдик. Ўз режамиз ва стратегиямиз бор. Майдонда айнан ўз ўйинимизни намойиш этишга ҳаракат қиламиз. Биз жуда кучли жамоага қарши майдонга тушаётганимизни биламиз, аммо бундан қўрқмаймиз. Ижобий натижага эришишнинг ягона йўли — жамоа сифатида биргаликда ҳаракат қилиш ва охиригача курашишдир”, — деди Каннаваро.
Италиялик мутахассис футболчиларнинг жисмоний тайёргарлиги масаласига ҳам алоҳида тўхталиб ўтди. Унинг таъкидлашича, мураббийлар штаби терма жамоага келганидан буён футболчиларнинг жисмоний ҳолатини яхшилаш устида иш олиб борган.
“Баъзи футболчилар турли чемпионатлардан келишди, айримларида эса маълум муаммолар бор эди. Шунга қарамай, сўнгги учрашувда жамоанинг жисмоний ҳолати яхши эканини кўрдик. Футболчилар ўйинни юқори темпда якунлади. Статистик маълумотларни таҳлил қилиш осон эмас. Мен фақат югурилган масофа ёки жисмоний кўрсаткичларга қараш тарафдори эмасман. Муҳими — тўпни қандай назорат қилишингиз, уни қанчалик кам йўқотишингиз ва қаерда қайтариб олишингиздир. Агар тўпни кўп йўқотсангиз, уни қайтариб олиш учун яна кўпроқ куч сарфлашга мажбур бўласиз. Замонавий футболда масала кўп югуришда эмас, балки тўғри югуришда. Футболчилар майдонда тартибсиз ҳаракат қилмаслиги, қаерда босим қилиш ва қаерда тўпни қайтариб олиш кераклигини яхши билиши зарур”, — дея таъкидлади Ўзбекистон терма жамоаси бош мураббийи.
Маълумот учун, Ўзбекистон ва Португалия терма жамоалари ўртасидаги ЖЧ—2026 гуруҳ босқичи иккинчи тур учрашуви 23 июнь куни бўлиб ўтади. Баҳс Тошкент вақти билан соат 22:00 да бошланади.
