Роналдунинг голи ва Рамоснинг сўнгги дақиқадаги зарбаси Португалияни финалга олиб чиқди
Хорватия мундиал билан хайрлашди, Лука Модрич Жаҳон чемпионатидаги сўнгги учрашувини ўтказди.
2026 йилги FIFА Жаҳон чемпионатининг 1/16 финал босқичида Португалия терма жамоаси Хорватия устидан 2:1 ҳисобида ғалаба қозониб, мусобақанинг 1/8 финалига йўл олди.
Торонто шаҳрида бўлиб ўтган учрашувда Хорватия ҳисобни Иван Перишичнинг 53-дақиқадаги голи эвазига очди. Португалия эса 68-дақиқада Криштиану Роналду ҳамда қўшимча вақтнинг 90+4-дақиқасида Гонсалу Рамос киритган голлар ҳисобига иродали ғалабани қўлга киритди.
Мазкур гол Роналду учун Жаҳон чемпионати плей-офф босқичидаги тўққиз ўйиндан кейинги илк гол бўлди.
Ушбу баҳс Хорватия терма жамоаси сардори Лука Модрич учун Жаҳон чемпионатидаги сўнгги учрашув сифатида тарихга кирди. 40 ёшли ярим ҳимоячи фаолияти давомида бешта мундиалда иштирок этиб, Хорватия билан кумуш ва бронза медалларини қўлга киритган.
Эндиликда Португалия терма жамоаси 1/8 финалда Испанияга қарши майдонга тушади. Учрашув 6 июль куни бўлиб ўтади.
