Судьяликка номзодлар учун ёш талаби 30 ёшга туширилиши мумкин
Шунингдек, судьяни дастлаб беш йил муддатга, кейинчалик муддатсиз тайинлаш тартибини жорий этилиш таклиф қилинди.
Судьялик лавозимига номзодлар ва халқ маслаҳатчилари учун белгиланган ёш чегарасини 35 ёшдан 30 ёшга тушириш таклиф қилинмоқда.
“Судьяларнинг мақоми тўғрисида”ги қонун лоҳияси билан судьялик лавозимига номзодларга қўйиладиган айрим талабларни қайта кўриб чиқиш назарда тутилган. Жумладан, судьялар ва халқ маслаҳатчилари учун ёш чегарасини 30 ёш этиб белгилаш таклиф қилинмоқда.
Шунингдек, судьяни дастлаб беш йил муддатга, кейинчалик эса муддатсиз даврга тайинлаш тартибини жорий этиш режалаштирилган. Судья, суд раиси ва раис ўринбосари лавозимларига қўйиладиган талабларни кучайтириш ҳам кўзда тутилмоқда.
Лойиҳада судьялар ва уларнинг оила аъзоларини ижтимоий ҳимоя қилишга қаратилган қатор нормалар ҳам назарда тутилган.
Бундан ташқари, миллий қонунчиликка “истеъфодаги судья” институтини жорий этиш таклиф қилинмоқда. Бундай судьяларга бошқа ҳуқуқлар қатори профессионал медиаторлик фаолияти билан шуғулланиш имконияти берилиши мумкин.
Қонун лойиҳасида Олий суд ва қуйи судлар аппаратлари фаолиятини самарали ташкил этишга қаратилган бошқа қатор нормалар ҳам ўрин олган.
