Фарғонада ҳокимлик лавозими учун 210 минг доллар талаб қилган шахс ушланди
У фуқаронинг ишончига кириб, ўзини Ўзбекистон ҳакамлик суди судьясининг ёрдамчиси сифатида таништирган.
Фарғонада 210 минг АҚШ доллари эвазига фуқарони Учкўприк тумани ҳокими лавозимига тайинлатиб қўйишни ваъда қилган шахс ушланди. Бу ҳақда Бош прокуратура ҳузуридаги Департамент хабар берди.
Маълум қилинишича, фуқаро С. А. фуқаро И. Д. нинг ишончига кириб, ўзини Ўзбекистон ҳакамлик суди судьясининг ёрдамчиси сифатида таништирган. У юқори лавозимларда ишловчи танишлари орқали 210 минг АҚШ доллари эвазига И. Д. ни Учкўприк тумани ҳокими лавозимига ишга жойлаштириб қўйишини ваъда қилган.
Тезкор тадбир давомида С. А. келишилган маблағнинг 100 минг АҚШ долларини олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг 25, 168-моддаси ҳамда 28, 211-моддаси билан жиноят иши қўзғатилган.
Ҳозирда ҳолат юзасидан тергов ҳаракатлари олиб борилмоқда.
