Қашқадарё ва Жиззахдаги икки чўққига расмий ном берилди

 

Ўзбекистонда илгари расман номсиз бўлган иккита тоғ чўққисига «Музқоя» ва «Қирққиз» номлари берилди. Шунингдек, мамлакат бўйлаб 124 та географик объектнинг номлари давлат тили меъёрларига мувофиқлаштирилди.

 

Бу ҳақда Ўзбекистон Республикаси Вазирлар Маҳкамасининг 2026 йил 9 июлдаги 376-сон қарорида белгиланган.

 

Қарорга мувофиқ, республика ҳудудидаги тоғ тизмалари, чўққилар, довонлар, даралар ва ғорларнинг номлари қайта кўриб чиқилди. Жами 124 та географик объектнинг номлари ўзгартирилди ёки тузатилди. Уларнинг 117 таси тоғ тизмалари, чўққилар ва довонлар, қолганлари эса даралар ва ғорлардан иборат.

 

Янги ном берилган объектлардан бири Қашқадарё вилоятидаги Музқоя чўққиси бўлиб, у Ҳисор давлат табиат қўриқхонаси ҳудудида жойлашган. Чўққининг баландлиги 4360 метрни ташкил этади. Ном унинг атрофидаги музликлар мавжудлиги билан боғлиқ.

 

Шунингдек, Жиззах вилоятидаги Қирққиз чўққисига ҳам расмий ном берилди.

 

Ҳудудлар кесимида Андижонда 1 та, Бухорода 12 та, Фарғонада 10 та, Жиззахда 54 та, Наманганда 5 та, Навоийда 12 та, Қашқадарёда 11 та, Самарқандда 6 та, Сурхондарёда 4 та ва Тошкентда 8 та географик объектнинг номлари тасдиқланди.

 

Ислоҳотлар доирасида айрим географик номлар лотин ёзувига асосланган ўзбек алифбоси ва давлат тили меъёрларига мослаштирилди. Жумладан, Жиззахдаги Қизилтурук тоғ тизмаси Қизилтўриқ, Навоийдаги Арйстантов тоғ тизмаси Арслонтов, Қашқадарёдаги “Тамерлан ғори” эса Амир Темур ғори деб белгиланди.

 

Тасдиқланган географик номлардан хариталар, маълумотлар базалари ва расмий иш юритишда фойдаланиш мажбурий бўлади. Тегишли давлат ташкилотларига икки ой муддатда хариталар ва маълумотлар базаларига ўзгартиришлар киритиш вазифаси юклатилган.