Хорижда ота-она қарамоғисиз қолган 11 нафар бола Ўзбекистонга қайтарилди
Уларнинг 9 нафари Россия, 2 нафари Қозоғистондан олиб келинган.
Хорижий давлатларда ота-она қарамоғисиз қолган 11 нафар вояга етмаган бола Ўзбекистонга қайтарилди. Бу ҳақда Ижтимоий ҳимоя агентлиги матбуот хизмати маълум қилди.
Қайд этилишича, ўтган ҳафта давомида олиб борилган ишлар натижасида 9 нафар бола Россия Федерациясидан, 2 нафар бола эса Қозоғистон Республикасидан Ватанга олиб келинган.
Вояга етмаганларни Ўзбекистонга қайтариш ишлари Ички ишлар вазирлиги, Соғлиқни сақлаш вазирлиги ҳамда Президент ҳузуридаги Ижтимоий ҳимоя миллий агентлиги ходимларидан иборат ишчи гуруҳ томонидан амалга оширилган.
Мазкур жараёнда Олий Мажлиснинг Бола ҳуқуқлари бўйича вакили — Болалар омбудсмани кўмагида хорижий давлатларнинг ваколатли органлари билан ҳамкорлик қилинган.
Ватанга қайтарилган болаларнинг ҳуқуқ ва қонуний манфаатларини таъминлаш, уларни оилавий муҳитга қайтариш ҳамда зарур ижтимоий хизмат ва ёрдамлар билан қамраб олиш бўйича тегишли чоралар кўрилмоқда.
Болаларнинг кейинги ҳолати ва оилага мослашуви яшаш манзили бўйича «Инсон» ижтимоий хизматлар марказлари томонидан ижтимоий ҳамроҳлик асосида кузатиб борилади.
