171 нафар фуқаро номидан фойдаланиб, 220 млн сўмлик газ ўзлаштирилган

 

Қорақалпоғистон Республикаси ва Самарқанд вилоятида қарийб 370 миллион сўмлик суюлтирилган газни ўзлаштириш билан боғлиқ ҳолатлар аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.

 

Департаментнинг Амударё тумани бўлими томонидан ўтказилган терговга қадар текширувда «Амударётумангаз» масъул шахслари ўзаро тил бириктириб, 7 та МФЙ ҳудудида яшовчи 171 нафар фуқаронинг номидан ноқонуний фойдалангани аниқланган.

 

Маълум бўлишича, ушбу фуқароларнинг хонадонлари умумий фойдаланишдаги табиий газ тармоғига уланган бўлса-да, уларнинг номига электрон карталар очилган. Суюлтирилган газ етказиб берилгани ҳақида сохта маълумотлар расмийлаштирилиб, 220,3 миллион сўмлик суюлтирилган газ растрата йўли билан талон-торож қилинган.

 

Шунингдек, Департаментнинг Нуробод тумани бўлими томонидан ўтказилган терговга қадар текширувда «Нурободтумангаз» масъул шахслари суюлтирилган газни сотишдан тушган 148,3 миллион сўм маблағни банкка топширмасдан, ўзлаштириш йўли билан талон-торож қилгани аниқланган.

 

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 209-моддаси (мансаб сохтакорлиги) билан жиноят ишлари қўзғатилган.

 

Ҳозирда ҳолатлар юзасидан тергов ҳаракатлари олиб борилмоқда.