Лицензиялашдаги ҳуқуқбузарликлар ҳақида хабар берганлар рағбатлантирилади
Уларга ундирилган жариманинг 10 фоизи миқдорида мукофот берилади.
Ўзбекистонда лицензиялаш, рухсат бериш ва хабардор қилиш тартиб-таомилларига оид ҳуқуқбузарликлар ҳақида ваколатли органларга хабар берган жисмоний ва юридик шахсларни пул мукофоти билан рағбатлантириш тартиби белгиланди.
Бу Ҳукуматнинг 2026 йил 4 сентябрдаги 466-сон қарори билан тасдиқланган низомда назарда тутилган.
Унга кўра, фуқаролар ва юридик шахслар лицензиялаш, рухсат бериш ҳамда хабардор қилиш тартиб-таомилларига оид аниқланган ҳуқуқбузарликлар ҳақида ваколатли органларга хабар бериши мумкин.
Хабарлар махсус электрон тизим ёки Адлия вазирлигининг мобил иловаси орқали юборилади.
Видеотехника воситалари орқали қайд этилган ҳуқуқбузарлик бўйича тақдим этиладиган фото ва видеоматериалларда ҳуқуқбузарликнинг ўзи, ҳуқуқбузар ҳақидаги маълумотлар мавжуд бўлса, шунингдек, ҳодиса содир этилган сана ва вақт акс этган бўлиши керак.
Ваколатли орган келиб тушган хабарни 10 иш куни давомида кўриб чиқади.
Агар хабарда келтирилган маълумотлар тасдиқланса ва унинг асосида ваколатли орган ёки суд томонидан айбдор шахсни жавобгарликка тортиш тўғрисида қарор қабул қилинса, ундирилган жариманинг 10 фоизи миқдорида бир марталик пул мукофоти хабар берган шахсга берилади.
