Ижтимоий реестрдан чиқариш камбағаллик қисқарганини англатмайди — Ижтимоий ҳимоя агентлиги
Агентлик Ижтимоий реестрдан фуқароларни чиқариш билан боғлиқ ҳолатларга изоҳ берди.
Ижтимоий тармоқларда фуқароларни Ижтимоий реестрдан чиқариш билан боғлиқ ҳолатлар юзасидан турли фикрлар билдирилмоқда. Ижтимоий ҳимоя миллий агентлиги ушбу масала бўйича расмий муносабат билдирди.
Агентлик маълумотига кўра, ҳудудларда камбағалликни қисқартириш, оилалар даромадини ошириш ва уларни барқарор даромад манбаи билан таъминлаш бўйича тизимли ишлар олиб борилмоқда.
Шу билан бирга, оилани Ижтимоий реестрдан чиқаришнинг ўзи камбағаллик қисқарганини англатмайди. Ижтимоий реестрнинг асосий мақсади эҳтиёжманд аҳолини аниқлаш, уларни ижтимоий ҳимоя билан қамраб олиш ҳамда зарур ёрдам ва хизматларни кўрсатишдан иборат.
Агентлик таъкидлашича, реестрдан чиқариш оиланинг ижтимоий-иқтисодий ҳолати амалда яхшилангани ва белгиланган мезонларга жавоб бергани асосида амалга оширилиши керак. Бу жараён маълум кўрсаткич ёки режани бажариш мақсадида олиб борилмаслиги лозим.
Ҳудуддаги камбағаллик даражаси эса Жаҳон банки методологияси асосида белгиланган стандартлар бўйича ўтказиладиган сўровлар натижаларига кўра аниқланади.
Шунингдек, Ижтимоий ҳимоя миллий агентлиги ҳузуридаги Ижтимоий ҳимоя инспекцияси томонидан реестрдан чиқарилган оилалар бўйича назорат ишлари олиб борилмоқда. Жараёнда қабул қилинган қарорларнинг белгиланган мезон ва тартибларга мувофиқлиги ўрганилмоқда.
Агентликнинг қайд этишича, асосий мақсад фуқароларни реестрдан чиқариш эмас, оилаларни ҳақиқатан ҳам камбағалликдан чиқариш ва эҳтиёжманд фуқароларнинг ижтимоий ҳимояга бўлган ҳуқуқларини таъминлашдан иборат.
