Суд раиси хонасидан пул топилди: хизмат текшируви бошланди
Ҳозирча судьянинг пул сўрагани ёки олганини тасдиқловчи далил йўқ.
Бухоро шаҳар суди раисининг хизмат хонасидан пул маблағлари топилгани юзасидан Судьялар олий кенгаши томонидан хизмат текшируви ўтказилмоқда. Бу ҳақда Судьялар олий кенгаши ахборот хизмати маълум қилди.
Қайд этилишича, мазкур ҳолат бўйича адвокатга нисбатан тергов ҳаракатлари, судьяга нисбатан эса хизмат текшируви олиб борилмоқда.
Кенгаш маълумотига кўра, ҳозирга қадар судьянинг адвокатдан пул сўрагани ёки олганини тасдиқловчи далиллар аниқланмаган.
Пул маблағлари адвокатнинг ёнидан, шунингдек, судьянинг хизмат хонасига кириш қисмидаги шкафнинг очиқ ва кўриниб турадиган ўрта қисмидан расмийлаштириб олинган.
Айни пайтда хизмат текшируви ва тергов давом этмоқда. Уларнинг натижалари бўйича қўшимча ахборот берилиши маълум қилинган.
Судьялар олий кенгаши тасдиқланмаган маълумотларни тарқатмасликка, айбсизлик презумпциясига риоя қилишга ва шошилинч хулосалар чиқармасликка чақирди.
