Ўзбекистонда хорижий фуқаролар ҳам давлат ижтимоий суғуртаси тизимидан фойдаланиши мумкин
Ҳомиладорлик ва туғиш нафақасини олиш учун ихтиёрий суғурта тизимида камида 10 ой давомида суғурта бадаллари тўланган бўлиши талаб этилади.
“Давлат ижтимоий суғуртаси тўғрисида”ги Қонуннинг 5-моддасига мувофиқ, айрим тоифадаги хорижий фуқаролар ҳам давлат ижтимоий суғуртаси тизимида иштирок этиш ҳуқуқига эга. Бу ҳақда Ижтимоий ҳимоя миллий агентлиги бош мутахассиси Дилшодхон Мухамеджанова Zamon.uz'га маълум қилди.
Хусусан, Ўзбекистон Республикасида меҳнат фаолиятини амалга ошираётган хорижий фуқаролар, агар Ўзбекистон Республикаси ва уларнинг фуқаролиги мансуб бўлган давлат ўртасида ижтимоий таъминот соҳасида халқаро шартнома мавжуд бўлса, ушбу шартнома шартларига мувофиқ давлат ижтимоий суғуртаси тизимидан фойдаланиши мумкин.
Агар бундай халқаро шартнома мавжуд бўлмаса, хорижий фуқаролар давлат ижтимоий суғуртаси тизимида “Давлат ижтимоий суғуртаси тўғрисида”ги Қонунига мувофиқ ихтиёрий равишда иштирок этишлари мумкин. Бунинг учун улар «Барака» мобил иловаси орқали рўйхатдан ўтиб, ихтиёрий суғурта бадалларини тўлаб борадилар.
“Бугунги кунда ихтиёрий суғурта бадалининг энг кам миқдори меҳнатга ҳақ тўлашнинг энг кам миқдорининг 5 фоизини ташкил этади ва бугунги белгиланган миқдор билан бу 63 550 сўмни ташкил қиляпти. Ушбу суғурта бадалларини ойма-ой тўлаб бориш натижасида белгиланган суғурта стажига эга бўлган хорижий фуқаролар ўрнатилган тартибда нафақаларни олишлари мумкин бўлади”, дейди мутахассис.
Ихтиёрий суғурта бадалларини белгиланган тартибда тўлаб борган хорижий фуқаролар зарур суғурта стажини шакллантирган тақдирда давлат ижтимоий суғуртаси тизими доирасидаги тегишли нафақаларни олиш ҳуқуқига эга бўладилар.
Масалан, ҳомиладорлик ва туғиш нафақасини олиш учун ихтиёрий суғурта тизимида камида 10 ой давомида суғурта бадаллари тўланган бўлиши талаб этилади. Суғурта ҳодисаси юз берганда нафақа Давлат ижтимоий суғурта жамғармаси томонидан қонунчиликда белгиланган тартибда тайинланади ва тўланади.
Мутахассисларнинг таъкидлашича, «Барака» мобил иловаси фойдаланувчиларга қулайлик яратиш мақсадида бир неча тилларда фаолият юритади.
