"Бунёдкор" стадионида катта тартибсизлик юз берди: жабрланганлар бор
Ўзбекистон-Португалия ўйинини кўргани борганлар кўрсатмаларга риоя қилмай, стадионга киришга уринган ва катта тирбандлик юзага келган.
Тошкентдаги “Бунёдкор” стадиони яқинида Ўзбекистон ва Португалия терма жамоалари ўртасидаги Жаҳон чемпионати учрашуви трансляцияси вақтида юзага келган тиқилинч оқибатида одамлар жабрлангани аниқланган. Бу ҳақда Gazeta.uz хабар берди.
Тармоқларда тарқалган видеоларда стадион ҳудудига киришга уринаётган фуқаролар, айримларнинг тўсиқлардан ошиб ўтаётгани ҳамда ҳуқуқ-тартибот органлари ва Миллий гвардия ходимларининг оломонни назорат қилишга уринаётгани акс этган.
Тошкент шаҳри ИИББ маълумотига кўра, 23 июнь куни “Бунёдкор” стадиони фан-зонасида ўйинни томоша қилиш учун ажратилган барча ўринлар тўлиб бўлган.
Шу сабабли соат тахминан 21:00 да стадионга кириш вақтинча тўхтатилган ва ташриф буюрган фуқароларга бошқа туманлардаги фан-зоналарга бориш тавсия этилган.
Билдирилишича, фуқароларнинг бир қисми ушбу қарордан норози бўлиб, белгиланган тартибни бузган ҳолда стадион ҳудудига киришга уринган. ИИББ ва Миллий гвардия ходимлари томонидан жамоат тартиби тикланган, тартибни бузишга уринган шахслар билан профилактик суҳбатлар ўтказилиб, уларга расмий огоҳлантириш берилган.
Республика шошилинч тиббий ёрдам илмий маркази ҳодисадан сўнг жабрланганлар тиббиёт муассасасига олиб келинганини нашрга тасдиқлаган. Бироқ уларнинг сони ва жароҳатларининг оғирлик даражаси ҳақида маълумот берилмаган.
Тошкент шаҳри ИИББ ҳам ҳодиса оқибатида жабрланганлар борлигини маълум қилиб, уларнинг сони ва аҳволи юзасидан маълумот олиш учун Соғлиқни сақлаш вазирлигига мурожаат қилишни тавсия этган.
