Президент Андижондаги халқаро маданий тадбирлар иштирокчиларига табрик йўллади
Шавкат Мирзиёев Андижоннинг “Туркий дунёнинг маданият пойтахти” мақомини Ўзбекистоннинг бой маданий мероси ва халқаро нуфузининг эътирофи деб атади.
Ўзбекистон Президенти Шавкат Мирзиёев Андижон шаҳрининг 2026 йилда “Туркий дунёнинг маданият пойтахти” деб эълон қилиниши муносабати билан ўтказилаётган тадбирлар иштирокчиларига табрик йўллади.
Давлат раҳбари ўз мурожаатида халқаро ташкилотлар раҳбарлари, хорижий давлатлар элчилари ҳамда туркий дунёнинг маданият, адабиёт ва санъат намояндаларини қутлар экан, Андижонга бундай юксак мақом берилганини Ўзбекистоннинг бой тарихий-маданий мероси, туркий маданият ривожига қўшган ҳиссаси ва мамлакатда амалга оширилаётган ислоҳотларнинг халқаро эътирофи сифатида баҳолади.
Президент таъкидлашича, асрлар давомида маданият, адабиёт, санъат ва ҳунармандчилик марказларидан бири бўлиб келган. Ушбу заминдан етишиб чиққан Заҳириддин Муҳаммад Бобур, Абдулҳамид Чўлпон каби буюк сиймолар, шунингдек, “Андижон полькаси” рақси ва аския санъати туркий халқлар маданий меросининг муҳим қисми экани қайд этилди.
Табрикда Ўзбекистоннинг ТУРКСОЙ билан ҳамкорлигига ҳам алоҳида эътибор қаратилди. Хусусан, “Туркий адабиёт дурдоналари”нинг 100 жилдлик тўплами нашр этилгани, қатор илмий ва маданий тадбирлар ташкил этилгани ҳамда жорий йил апрель ойида Ислом цивилизацияси марказида ТУРКСОЙ офиси очилгани таъкидланди.
Шавкат Мирзиёев “Андижон – Туркий дунёнинг маданият пойтахти” лойиҳаси доирасида йил давомида ўтказиладиган фестиваль, илмий анжуман, бадиий кеча ва ижодий учрашувлар халқлар ўртасидаги дўстлик ва ҳамжиҳатликни янада мустаҳкамлашига ишонч билдирди.
Давлат раҳбари тадбир иштирокчиларига сиҳат-саломатлик ва муваффақиятлар тилаб, меҳмонларни Андижон шаҳрига хуш келибсиз деб қутлади.
