Рақобат қўмитаси дори воситалари рекламаларидаги чалғитувчи иборалардан огоҳлантирди
Айрим дори воситалари рекламаларида “энг самарали”, “энг хавфсиз”, “кафолатланган натижа” ёки “ножўя таъсирлари мавжуд эмас” каби истеъмолчиларни чалғитиши мумкин бўлган иборалар қўлланмоқда.
Рақобат қўмитаси сўнгги пайтларда оммавий ахборот воситалари, ижтимоий тармоқлар ва мессенжерларда дори воситалари рекламаларида истеъмолчиларни чалғитувчи ёки чалғитиши мумкин бўлган бўрттирилган иборалар қўлланаётганига эътибор қаратди.
Қайд этилишича, айрим рекламаларда дори воситалари “ноёб”, “энг самарали”, “энг хавфсиз”, “кафолатланган натижа”, “энг ишончли восита”, “тез даволайди”, “ножўя таъсирлари мавжуд эмас” ёки “самараси исботланган” каби таърифлар билан тарғиб қилинмоқда.
Қўмита бундай маълумотлар истеъмолчиларда дори воситаларининг хусусиятлари ҳақида нотўғри тасаввур уйғотиши, шифокор тавсиясисиз ўзини-ўзи даволашга ундаши ҳамда саломатлик учун салбий оқибатларга олиб келиши мумкинлигини таъкидлади.
“Реклама тўғрисида”ги қонуннинг 34-моддасига мувофиқ, дори воситалари рекламаларида мустақил даволаниш мумкинлиги ҳақида таассурот уйғотиш, олимлар, тиббиёт ходимлари ёки машҳур шахсларнинг тавсияларидан фойдаланиш, алоҳида шахсларнинг миннатдорлик изҳорлари ва муваффақиятли даволаниш ҳолатларини келтириш, препаратни энг самарали, энг хавфсиз ёки ноёб восита сифатида тақдим этиш, таъсири кафолатланганини даъво қилиш ҳамда бошқа дори воситалари билан нотўғри таққослашлар қилиш тақиқланади.
Шунингдек, рецептсиз бериладиган дори воситалари рекламаларида қўллаш бўйича қарши кўрсатмалар мавжудлиги ва мутахассис маслаҳатини олиш зарурлиги ҳақидаги огоҳлантириш ҳам бўлиши шарт.
Рақобат қўмитаси реклама берувчилар ва реклама тарқатувчиларни қонунчилик талабларига қатъий риоя қилишга, фуқароларни эса дори воситаларини танлашда фақат реклама эмас, балки шифокор тавсияларига таянишга чақирди.
