“Одамлар турмушини яхшилашга қаратилган ўзгаришлар чўзилмаслиги керак” — Саида Мирзиёева
Андижон вилоятидаги бир қатор ижтимоий объектлар, жумладан, Олтинкўлдаги “Кўмакай” оилавий поликлиникаси, 9-сонли боғча ва 36-сонли мактаб янгиланади.
Саида Мирзиёева Андижон вилоятига ташрифи давомида зудлик билан янгиланиши талаб этилаётган қатор ижтимоий объектларни кўздан кечирди.
Жумладан, Олтинкўл туманидаги “Кўмакай” оилавий поликлиникаси биноси ўрганилди. Мазкур муассаса 1988 йилдан буён фойдаланиб келинаётгани ва бугунги талаб ҳамда стандартларга жавоб бермаслиги қайд этилди.
Шунингдек, 9-сонли боғча ҳамда 36-сонли мактаб фаолияти билан танишилди. Маълум қилинишича, боғча 1970 йилларда қурилган собиқ оромгоҳ ҳудудида жойлашган, 36-сонли мактаб эса 1960 йилда барпо этилган бўлиб, унинг сиғими ўқувчилар сонига мос келмайди. Ҳар икки объектни янгидан қуриш режалаштирилган.
Саида Мирзиёева таълим ва тиббиёт соҳасида шифокорлар ҳамда педагоглар учун муносиб меҳнат шароитларини яратиш, ота-оналарнинг фарзандларини мактаб ва боғчаларга ишонч билан юбориши учун зарур инфратузилмани шакллантириш устувор вазифа эканини таъкидлади.
"Одамлар турмушини яхшилашга қаратилган ўзгаришлар ўн йиллаб чўзилмаслиги керак. Жараённи тезлаштириш, аниқ ва сезиларли натижа тез фурсатда амалда кўриниши лозим", дея ёзди Саида Мирзиёева.
