Ўзбекистонда қурилиш ҳажми 9 йилда 10 баравардан ошди

 

Шавкат Мирзиёев раислигида ўтказилган қурилиш соҳасидаги устувор вазифаларга бағишланган видеоселектор йиғилишида сўнгги йилларда эришилган натижалар муҳокама қилинди.

 

Йиғилишда қайд этилишича, сўнгги тўққиз йил ичида Ўзбекистонда қурилиш ишлари ҳажми ўн баравардан зиёд ошиб, 2016 йилдаги 30 триллион сўмдан 2025 йилда 314 триллион сўмга етган.

 

Тадбирда республика ва ҳудудлардан 500 дан ортиқ девелопер, қурувчи, лойиҳачи, архитектор ҳамда урбанистлар иштирок этди. Давлат раҳбари иқтисодий ўсишнинг юқори суръатларини таъминлашда қурилиш соҳасининг ўрни беқиёс эканини алоҳида таъкидлади.

 

Сўнгги йилларда соҳада сезиларли таркибий ўзгаришлар амалга оширилди. Хусусан, 10 мингга яқин янги қурилиш корхоналари фаолият бошлади. Айланмаси 1 триллион сўмдан ошган 20 та, 100 миллиард сўмдан ортиқ 365 та йирик компаниялар шаклланди. Лойиҳа ташкилотлари сони 2 мингдан ошиб, улардан 650 дан зиёди халқаро сертификатларга эга бўлди.

 

Шунингдек, қурилиш жараёнларида рухсат бериш босқичлари 3 баравар, муддатлари эса 4 баравар қисқартирилди. 420 та шаҳарсозлик норма ва қоидалари оптималлаштирилиб, 140 та янги стандартлар тасдиқланди.

 

Натижада, ўтган даврда умумий майдони 210 миллион квадрат метр бўлган бино-иншоотлар, 647 минг хонадонли 15 мингдан ортиқ кўп қаватли уйлар барпо этилди.

 

Бугунги кунда қурилиш, қурилиш материаллари ишлаб чиқариш ва унга ёндош соҳаларда 3,5 миллион нафар аҳоли бандлиги таъминланган.