Бухорода маст ҳайдовчи 5 ёшли болани уриб юборди
Ҳайдовчи бошқарувини йўқотиб автомобиллар билан ЙТҲ содир этган.
Бухоро шаҳрида маст ҳолатда транспорт бошқарган ҳайдовчи иштирокида йўл-транспорт ҳодисаси содир бўлиб, 5 ёшли бола жабрланди. Бу ҳақда вилоят ИИБ ахборот хизмати хабар берди.
Маълум қилинишича, 15 апрель куни 1981 йилда туғилган ҳайдовчи Chery русумли автомобилда Алпомиш кўчасида ҳаракатланиб кетаётган вақтда пиёдаларни ўтказиш учун тўхтаб турган Onix автомобили орқа қисмига урилган.
Тўқнашувдан сўнг ҳайдовчи бошқарувни йўқотиб, қарши йўналишда пиёдаларга йўл бериб турган Lacetti билан ҳам тўқнашган. Шу жараёнда у пиёдалар йўлакчасидан ўтаётган 2021 йилда туғилган болани уриб юборган.
Ҳайдовчи ҳаракат давомида яна бир автомобилга зарар етказиб, воқеа жойидан яширинган. Олиб борилган суриштирувлар давомида унинг транспорт воситасини спиртли ичимлик таъсирида бошқаргани аниқланди ва бу ҳолат белгиланган тартибда расмийлаштирилди.
Ҳодиса юзасидан ҳайдовчига нисбатан Ўзбекистон Республикаси Маъмурий жавобгарлик тўғрисидаги кодексининг 131-моддасига асосан маъмурий баённома тузилган. Унга нисбатан камида 3 йилга ҳайдовчилик ҳуқуқидан маҳрум этиш ва базавий ҳисоблаш миқдорининг 40 бараваригача жарима қўллаш мумкин.
Айни вақтда ҳолат бўйича терговга қадар суриштирув ҳаракатлари давом этмоқда.
