Эронга қарши ҳужумлар минтақага жиддий таъсир кўрсатмоқда — Эрдоған
Туркия урушни тўхтатиш учун дипломатик саъй-ҳаракатларни кучайтираётганини маълум қилди.
Туркия президенти Ражаб Тоййиб Эрдоған Анталия дипломатик форуми доирасида Ироқ Курд минтақаcи раҳбари Нечирван Барзани билан учрашув ўтказди.
Туркия Президент маъмурияти маълумотига кўра, музокаралар давомида томонлар минтақадаги сўнгги сиёсий ва хавфсизлик вазиятини батафсил муҳокама қилган.
Эрдоған Эронга қарши амалга оширилаётган ҳужумлар оқибатида юзага келган кескинлик бутун минтақага жиддий таъсир кўрсатаётганини таъкидлаган. Унинг сўзларига кўра, Туркия урушни тўлиқ тўхтатиш ва барқарор тинчлик муҳитини яратиш мақсадида дипломатик саъй-ҳаракатларни кучайтирмоқда.
Туркия раҳбари, шунингдек, Эрон атрофидаги вазият фонида илгари сурилаётган сепаратистик сценарийлар ҳеч бир томон манфаатига хизмат қилмаслигини қайд этди. У Ироқдаги барқарорлик ва хавфсизликни сақлаш устувор вазифа бўлиб қолаётганини билдирган.
Бундан ташқари, Эрдоған Ҳурмуз бўғози атрофидаги воқеалар нефть таъминоти йўлларини диверсификация қилиш заруратини яна бир бор кўрсатганини айтган.
Шу муносабат билан у “Тараққиёт йўли” лойиҳасининг стратегик аҳамиятини алоҳида таъкидлаган.
