Ўзбекистон банк тизими активлари 932 трлн сўмдан ошди
Банкларнинг соф фойдаси ўтган йилнинг мос даврига нисбатан 36,3 фоизга кўпайиб, 3,1 трлн сўмга етган.
2026 йилнинг биринчи чораги якунларига кўра, Ўзбекистон банк тизимининг жами активлари 932,3 трлн сўмни (76,3 млрд доллар), мажбуриятлари эса 793,9 трлн сўмни (64,9 млрд доллар) ташкил этди. Бу ҳақда Иқтисодий тадқиқотлар ва ислоҳотлар маркази томонидан эълон қилинган “Банклар фаоллик индекси” ҳисоботида маълум қилинди.
Ҳисоботга кўра, мамлакат банк секторида ўсиш суръатлари сақланиб қолмоқда. Хусусан, кредит қўйилмалари 14 фоизга, депозитлар эса 32 фоизга ошган. Банкларнинг соф фойдаси ўтган йилнинг мос даврига нисбатан 36,3 фоизга кўпайиб, 3,1 трлн сўмга (254 млн доллар) етган. Шу билан бирга, муаммоли кредитлар улуши 4,5 фоиздан 3,3 фоизгача камайган.
Йирик банклар сегментида етакчилик сақланиб қолган. Хусусан, Капиталбанк рейтингда биринчи ўринни эгаллаб турибди. Умуман олганда, 20 та йирик банкдан 7 таси ўз позициясини яхшилаган, 8 таси пастлаган, 5 таси эса ўз ўрнини сақлаб қолган. Энг катта ўсиш Tenge Bank ҳиссасига тўғри келиб, у 6 поғонага кўтарилиб, умумий рейтингда 10-ўринга чиқди.
Шунингдек, Ҳамкор банк, Азия Альянс банк ва Ипак йўли банк 1 поғонадан, Халқ банки, Инвест финанс банк ва Агробанк эса 2 поғонадан юқорилаган. Аксинча, Ориент финанс банк 5 поғонага, Траст банк эса 3 поғонага пастлаган.
Алоҳида кўрсаткичлар кесимида етакчилар ҳам аниқланган. Молиявий воситачилик йўналишида Инвест финанс банк, Анор банк ва Капиталбанк олдинги ўринларни эгаллаган бўлса, молиявий оммабоплик бўйича Агробанк, Анор банк ва БРБ етакчилик қилган. Капитал етарлилиги бўйича Ориент финанс банк, Траст банк ва Халқ банки юқори натижа кўрсатган. Активлар сифати йўналишида Ҳамкор банк, Азия Альянс банк ва Ипак йўли банк етакчи бўлган. Бошқарув самарадорлиги бўйича Ўзсаноатқурилишбанк, Ориент финанс банк ва Ўзмиллийбанк юқори ўринларни эгаллаган. Даромадлиликда Ҳамкор банк, Траст банк ва Азия Альянс банк, ликвидлиликда эса Азия Альянс банк, Ипак йўли банк ва Траст банк етакчи сифатида қайд этилган.
Кичик банклар сегментида ҳам рақобат кучайган. 14 та банкдан 8 таси ўз ўрнини яхшилаган. Ушбу гуруҳда TBC Bank рейтинг етакчиси сифатида қайд этилган. Энг сезиларли ўсиш AVO банк ва Apex банк ҳиссасига тўғри келиб, улар 3 поғонадан юқорилаган. Шунингдек, Soderot банк, Garant банк ва Ziraat банк 2 поғонадан, Open банк ва Uzum банк эса 1 поғонадан ўсиш қайд этган. Оcтоbank эса 6 поғонага тушиб, энг катта пасайишни кўрсатган.
Маълумот учун, мазкур тадқиқот республикада фаолият юритаётган 34 та тижорат банкини қамраб олган бўлиб, уларнинг 20 таси йирик, 14 таси кичик банклар тоифасига киради. Индекс 27 та кўрсаткич асосида, жумладан халқаро стандартлар ва Базел қўмитаси талабларига мувофиқ шакллантирилган.
