Ҳормуз бўғозида мина тозалаш ишлари уч баробар тезлаштирилди — Трамп
АҚШ президенти ушбу жараённи жадаллаштириш бўйича қўшимча топшириқлар берган.
Дональд Трампнинг топшириқларига кўра, Ҳормуз бўғозида миналардан тозалаш ишлари уч баробаргача жадаллаштирилди. АҚШ президентининг ушбу баёноти Truth Social ижтимоий тармоғида эълон қилинган.
Маълумотларга кўра, АҚШ ҳарбий-денгиз кучларига бўғоз ҳудудида миналарни жойлаштиришга уринган ҳар қандай кемага нисбатан қатъий чоралар кўриш, жумладан, уларни йўқ қилиш бўйича кўрсатма берилган.
Трампнинг таъкидлашича, мина тозалаш ишларини олиб бориш суръати сезиларли даражада оширилган ва операция одатдагидан уч баробар тезроқ амалга оширилмоқда. Шу билан бирга, у ушбу жараённи жадаллаштириш бўйича қўшимча топшириқ берганини билдирган.
Аввалроқ Пентагон мутахассислари Ҳормуз бўғозини тўлиқ миналардан тозалаш ишлари камида олти ой давом этиши мумкинлигини маълум қилган эди.
