Ҳормуз бўғозини миналардан тозалашга олти ой кетади — Пентагон
Бўғоздаги кўплаб миналар координаталари қайд этилмасдан ўрнатилгани айтилган эди.
Пентагон АҚШ қонун чиқарувчиларига Ҳормуз бўғозини миналардан тозалаш ишлари тахминан олти ой давом этиши мумкинлигини маълум қилди. Бу ҳақда Associated Press агентлиги хабар берди.
Қайд этилишича, мазкур маълумот АҚШ Вакиллар палатасининг қуролли кучлар қўмитасида сешанба куни ўтказилган ёпиқ брифинг чоғида тақдим этилган.
Манба сўзларига кўра, йиғилиш давомида қонунчилар Эронга қарши ҳарбий ҳаракатлар нархи, стратегияси ва мақсадлари юзасидан кўплаб саволларни ўртага ташлаган. Бироқ, муҳокамалар кўпроқ аниқлик киритиш ўрнига янги саволларни юзага келтирган.
Шунингдек, конгресс аъзолари урушнинг дастлабки босқичида Эроннинг Минаб шаҳридаги мактаб мажмуасига берилган зарба бўйича ҳам ҳозирга қадар аниқ жавоб берилмаганини ҳам кўтарган.
Аввалроқ Эрон Ҳормуз бўғозида ўрнатилган миналарни аниқлаш ва зарарсизлантиришдаги қийинчиликлар сабаб денгиз йўлини тўлиқ очолмаётгани ҳақида хабар берилганди.
Бўғоздаги кўплаб миналар тартибсиз равишда ва координаталари қайд этилмасдан ўрнатилгани, айрим портловчи қурилмалар эса атайлаб эркин сузишга қўйиб юборилгани билдирилганди.
