Ўзбекистон Гвинея-Бисау билан дипломатик алоқалар ўрнатди
Ғарбий Африкадаги ушбу мамлакат Ўзбекистон билан дипломатик муносабатлар ўрнатган 168-давлат бўлди.
Нью-Йорк шаҳрида Ўзбекистоннинг БМТдаги доимий вакили Улуғбек Лапасов ва Гвинея-Бисаунинг БМТдаги миссияси раҳбари Самба Сане дипломатик алоқалар ўрнатиш тўғрисидаги Қўшма коммюникени имзолади. Бу ҳақда “Дунё” ахборот агентлиги хабар берди.
Маълум қилинишича, томонлар халқаро ташкилотлар, жумладан, БМТ ва унинг ихтисослашган муассасалари доирасида ҳамкорликни мустаҳкамлашдан манфаатдор эканини билдирди.
Икки томонлама алоқаларнинг ўзаро манфаатли йўналишларини топиш бўйича ҳамкорликни фаоллаштиришга келишиб олинди.
Ғарбий Африка давлати бўлган Гвинея-Бисау Республикаси Ўзбекистон дипломатик алоқалар ўрнатган 168-мамлакатга айланди.
Аввалроқ Анталия шаҳрида Ўзбекистон ва Руанда ўртасида дипломатик алоқалар ўрнатиш тўғрисида ҳужжат имзоланганди.
