Буюк Британия Парламенти ёшлар учун чекишни умрбод тақиқловчи қарорни маъқуллади
Ҳужжат тамаки маҳсулотлари таркиби, таъми ва қадоқланишини ҳам назорат қилиш ваколатини беради.
Буюк Британия парламентининг иккала палатаси ҳам ёшлар ўртасида чекишнинг олдини олишга қаратилган янги қонун лойиҳасини маъқуллади. Бу ҳақда ББС хабар берди.
Унга кўра, 2009 йил 1 январ ёки ундан кейин туғилган фуқароларга тамаки маҳсулотлари ҳамда электрон сигареталарни сотиш умрбод тақиқланади.
Маҳаллий ОАВ хабарига кўра, “Вейп ва сигареталар тўғрисида”ги қонун кучга кириши учун эндиликда қирол Чарлз ИИИ томонидан тасдиқланиши лозим.
Қонун лойиҳаси нафақат савдони тақиқлашни, балки ҳукуматга тамаки маҳсулотлари, электрон сигареталар ва бошқа никотин маҳсулотлари таркибини қатъий назорат қилиш ваколатини ҳам беради. Жумладан, маҳсулотларнинг таъми, дизайни ва қадоқланиши бўйича янги талаблар жорий этилиши мумкин.
Расмийларга кўра, мазкур ташаббуснинг асосий мақсади келажакда “чекишсиз авлод”ни шакллантириш, ёшлар орасида никотинга қарамликнинг олдини олиш ва соғлиқни сақлаш тизимига тушадиган юкни камайтиришдан иборат.
Қонун лойиҳаси дастлаб 2023 йилда муҳокамага киритилган эди. Унда чекиш ёши ҳар йили босқичма-босқич ошириб борилиши назарда тутилган бўлиб, узоқ муддатда тақиқ жамиятнинг кенг қатламларига татбиқ этилиши режалаштирилган.
