АҚШ НАТОдаги “яхши” ва “ёмон” иттифоқчиларни ажратмоқда — Politico
Оқ уй Эрон бўйича позициясини қўлламаган НАТО давлатларига нисбатан чоралар кўриш вариантларини муҳокама қилмоқда.
АҚШ маъмурияти НАТОга аъзо давлатларни альянсга қўшаётган ҳиссаси ҳамда Вашингтон ташқи сиёсатини қўллаб-қувватлаш даражасига қараб алоҳида тоифаларга ажратган махсус рўйхат тайёрлагани маълум қилинди. Бу ҳақда Politico нашри манбаларга таяниб хабар берди.
Нашр маълумотига кўра, Оқ уй айрим иттифоқчи давлатларни “яхши” ва “ёмон” ҳамкорлар сифатида баҳолаган. Хусусан, Эрон билан боғлиқ ҳарбий операцияларни қўллаб-қувватлашдан бош тортган мамлакатларга нисбатан турли босим чораларини кўриб чиқиш масаласи муҳокама қилинмоқда.
Қайд этилишича, мазкур ташаббус НАТО Бош котиби Марк Рюттенинг апрель ойи бошида Вашингтонга ташрифи олдидан АҚШ расмийлари томонидан ишлаб чиқилган. Унда ҳамкор мамлакатларнинг умумий хавфсизликка қўшаётган ҳиссаси, мудофаа харажатлари ва сиёсий қўллаб-қувватлаш даражаси таҳлил қилинган.
Таъкидланишича, бу ташаббус АҚШ президенти Дональд Трамп маъмуриятининг альянс ичидаги позициясини кучайтиришга қаратилган навбатдаги қадами сифатида баҳоланмоқда.
Манбаларга кўра, қора рўйхатга тушган давлатларга нисбатан қўшинларни жойлаштириш сиёсатини қайта кўриб чиқиш, қўшма ҳарбий машғулотларни қисқартириш ёки қурол-яроғ савдосида чекловлар жорий этиш каби чоралар кўриб чиқилиши мумкин.
Шунингдек, айрим давлатларга нисбатан ҳарбий ҳамкорликни кенгайтириш ва қўшимча имтиёзлар бериш вариантлари ҳам муҳокама қилинаётгани қайд этилди.
Аввалроқ Дональд Трамп НАТОнинг АҚШ манфаатларига етарли даражада хизмат қилмаётгани ҳақида танқидий фикр билдирган ҳамда айрим аъзо давлатларнинг Вашингтон ташаббусларини қўллаб-қувватламаётганидан норозилигини маълум қилган эди.
