Инвесторлар ва йирик кластерларга 40 га яқин стартап лойиҳаси тақдим қилинди
Инновацион ривожланиш агентлиги томонидан “Demo Day” тадбири ўтказилди.
Ўзбекистон Республикаси Мустақиллигининг 35 йиллиги муносабати билан Инновацион ривожланиш агентлиги томонидан стартап лойиҳаларини йирик ишлаб чиқариш кластерларига тақдим этишга қаратилган “Demo Day” тадбири ташкил этилди.
Унда Ўзбекистонда стартап экотизимини ривожлантириш, янги қўллаб-қувватлаш механизмларини жорий этиш ҳамда истиқболли инновацион лойиҳаларни йирик бизнес билан боғлаш масалаларига эътибор қаратилди.
Тадбирда 40 га яқин стартап лойиҳа муаллифлари ўз инновацион ишланмалари ва бизнес ғояларини инвесторлар ҳамда йирик ишлаб чиқариш кластерлари вакилларига тақдим этди. “Demo Day”да жами 60 нафарга яқин иштирокчи, жумладан, инвесторлар, венчур жамғармалари вакиллари, йирик ишлаб чиқариш кластерлари раҳбарлари ва тадбиркорлар қатнашди.
Тақдимотлар давомида стартапчилар ўз лойиҳаларининг технологик ечимлари, бозор имкониятлари ва ривожланиш истиқболлари ҳақида маълумот берди. Инвесторлар ва кластер вакиллари эса ўзларини қизиқтирган лойиҳалар билан яқиндан танишиб, уларни молиялаштириш, ишлаб чиқаришга жорий этиш ва ҳамкорликни йўлга қўйиш имкониятларини муҳокама қилди.
“Demo Day” стартап лойиҳаларини инвесторлар ва йирик ишлаб чиқариш кластерлари билан тўғридан-тўғри боғлаш, инновацион ишланмаларни амалиётга жорий этиш ҳамда янги бизнес лойиҳаларини ривожлантириш учун муҳим майдон бўлди.
