Тошкентда 1,2 километрлик BRT йўлаги фойдаланишга топширилди
Шаҳрисабз кўчасидаги BRT лойиҳасининг биринчи босқичи доирасида янги автобус бекатлари ва алоҳида ҳаракат йўлаги ташкил этилиб, йўл инфратузилмаси тўлиқ қайта қурилди.
Тошкент шаҳридаги Шаҳрисабз кўчасида BRT йўлагининг биринчи босқичи фойдаланишга топширилди. Бу ҳақда Тошкент шаҳрида Йўл ҳаракатини ташкил этиш маркази хабар берди.
Мазкур участка Шаҳрисабз, Миробод ва Шота Руставели кўчалари туташган айланма чорраҳадан Амир Темур шоҳ кўчаси билан кесишмагача бўлган 1,2 километрлик қисмни қамраб олади.
Қайд этилишича, лойиҳа доирасида йўлнинг мавжуд қопламаси янгиланибгина қолмай, остки конструкцияси ҳам тўлиқ қайта қурилди. Айрим қисмларда 2 метрдан ортиқ чуқурликкача қазиш ишлари бажарилиб, йўл пойдевори қайта шакллантирилди. Грунт намлиги ва кейинчалик чўкиш хавфини камайтириш учун геотекстил қопламаси ётқизилди.
Йўл асоси 35 сантиметр қалинликдаги қум-шағал аралашмаси, М-75 маркали мустаҳкамловчи қатлам, 9 сантиметр қалинликдаги йирик донали асфальт-бетон ва 5 сантиметр қалинликдаги PSHMA-20 қатламидан ташкил этилди.
BRT инфратузилмаси доирасида 5 та янги автобус бекати ташкил этилиб, жамоат транспорти учун алоҳида ҳаракат йўлаги яратилди. Йўлак умумий транспорт оқимидан бордюрлар ёрдамида жисмонан ажратилди.
Хабарга кўра, қурилиш ишлари давомида транспорт ҳаракати тўлиқ тўхтатилмади. Ишлар босқичма-босқич олиб борилиб, кўчанинг икки йўналишидаги чекка ўнг тасмаларда транспорт ҳаракати сақлаб қолинди.
Шаҳрисабз кўчасидаги 1,2 километрлик участка BRT инфратузилмасини ташкил этиш бўйича лойиҳанинг биринчи босқичи ҳисобланади. Умумий лойиҳа доирасида кўчанинг қарийб 3 километрлик қисмида BRT йўлагини ташкил этиш режалаштирилган.
Аввалроқ, Миробод туманидаги Шаҳрисабз кўчасида BRT (Bus Rapid Transit) йўлагини ташкил этиш бўйича қурилиш-таъмирлаш ишлари бошлангани ҳақида хабар берилганди.
