2023 йилдан бери Исроилнинг Ливанга ҳужумларида қарийб 9 минг киши ҳалок бўлди

Ливан соғлиқни сақлаш идоралари маълумотларига кўра, сўнгги уч йил давомида Исроилнинг Ливанга уюштирган ҳужумларида ҳалок бўлганлар сони 8 900 нафардан ошган, ярадорлар сони эса қарийб 30 600 нафарга етган. Бу ҳақда Al Jazeera хабар берди.

 

Ливан Соғлиқни сақлаш вазирлиги шанба куни берган баёнотида 2023 йил октябридан 2026 йил сентябригача бўлган даврда Исроил ҳужумлари оқибатида 8 920 киши ҳалок бўлгани ва 30 595 киши яраланганини маълум қилди.

 

Бу рақамлар 2 мартдан бери қайд этилган 4 358 нафар ҳалок бўлган ва 12 359 нафар яраланган кишини ҳам ўз ичига олади.

 

Соғлиқни сақлаш вазирлиги чоршанба куни эълон қилган ҳисоботда, шунингдек, 2 мартдан бери тез ёрдам бригадаларига 179 та Исроил ҳужуми уюштирилгани ва уларда 135 нафар тиббиёт ходими ҳалок бўлгани қайд этилган.

 

Бу сана Исроилнинг Ливанга қарши урушни навбатдаги кучайтирган кунига тўғри келади. Ўша куни «Ҳизбуллоҳ» шимолий Исроилга ракета учиргач, Исроилнинг Байрутга берган зарбаси оқибатида 31 киши ҳалок бўлган.

 

БМТнинг қочқинлар бўйича агентлиги — UNHCR маълумотларига кўра, август ойида Ливанда 360 минг киши Исроил таҳдиди сабаб уй-жойини тарк этишга мажбур бўлган. Уларнинг камида 22 минг нафари жамоавий бошпаналарда яшаган.

 

Бу маълумотлар июнь ойида АҚШ воситачилигида имзоланган икки томонлама «тинчлик» келишувига қарамай, Ливаннинг жанубида Исроил зўравонлиги кучайиб бораётган бир пайтда эълон қилинди.

 

Жума куни Ливан жанубидаги Кфар Румман ҳудудига берилган Исроил ҳаво зарбаси оқибатида уч киши ҳалок бўлиб, 23 киши яраланган.

 

Шунингдек, Ливан Миллий ахборот агентлиги Исроил кучлари Тир ва Набатия округларидаги етти аҳоли пунктини ҳаво ҳужумлари ва артиллерия ўқларидан нишонга олганини хабар қилди. Қурбонлар ҳақида маълумот берилмаган.

 

Якшанба куни эрта тонгда эса Исроил ҳарбий самолётлари Ливан жанубидаги Завтар аш-Шарқия ҳудудига зарба берган.