Деҳлида талабалар яшайдиган бино қулаб, 6 киши ҳалок бўлди
Ҳодисага сабаб сифатида бинонинг ертўласида сув тўпланиши ва таъмирлаш ишлари кўрсатилган.
Ҳиндистон пойтахти Деҳлида талабалар яшайдиган беш қаватли бино қулаб, камида олти киши ҳалок бўлган, яна бир неча киши жароҳатланган. Бу ҳақда Reuters хабар берди.
Ҳодиса 6 сентябрь куни шаҳарнинг жанубий қисмидаги, коллеж ва университетлар яқинида жойлашган ҳудудда юз берган. Бино ертўла ва беш қаватдан иборат бўлган ҳамда талабалар турар жойи сифатида фойдаланилган.
Деҳли бош вазири Рекҳа Гупта бинонинг ертўласида сув бўлганини, сув тўпланиши ва давом этаётган таъмирлаш ишлари эски бинонинг қулашига сабаб бўлган бўлиши мумкинлигини билдирган.
Қутқарувчилар вайроналар орасидан тирик қолганларни топиш учун махсус техника ва хизмат итларидан фойдаланган. Вайроналар остидан қутқариб олинган олти киши шифохонага етказилган ва уларнинг аҳволи барқарор экани маълум қилинган.
Полиция бино эгасини қидиришни бошлаган. Ҳодиса юз берган ҳудуд Деҳлининг зич жойлашган маҳаллаларидан бири бўлиб, унда талабалар учун кўплаб турар жойлар мавжуд.
Деҳли ҳукуматининг дастлабки маълумотларига кўра, бинонинг қулашига сув тўпланиши ва таъмирлаш ишлари сабаб бўлган бўлиши мумкин. Ҳодиса юзасидан қўшимча текширув олиб борилмоқда.
