Макрон Европа Иттифоқида 15 ёшгача бўлган болаларнинг ижтимоий тармоқлардан фойдаланишини тақиқлашни таклиф қилди
Унинг фикрича, бу чора Европа Иттифоқидаги барча болаларни онлайн хавфлардан ҳимоя қилишга хизмат қилади.
Франция президенти Эммануэл Макрон Европа Комиссияси президенти Урсула фон дер Ляенга Европа Иттифоқида 15 ёшгача бўлган болаларнинг ижтимоий тармоқлардан фойдаланишини чекловчи умумий Европа қонунчилигини ишлаб чиқишни таклиф қилди. Бу ҳақда AFP Франция президентининг Европа Комиссияси раҳбарига юборган мактубига таяниб хабар берди.
Макрон 29 август куни юборган мактубида 15 ёшгача бўлган шахсларнинг ижтимоий тармоқларга киришини тақиқлашни янги умумевропа ҳуқуқий ҳужжати орқали стандартлаштириш зарурлигини таъкидлаган. Унинг фикрича, бу чора Европа Иттифоқидаги барча болаларни онлайн хавфлардан ҳимоя қилишга хизмат қилади.
Франция президенти, шунингдек, Европа қонунчилигида ижтимоий тармоқларнинг ўзига қарамлик хусусиятларини аниқ белгилаш ва тартибга солиш, шунингдек, фойдаланиш вақтини чеклаш каби умумий хавфсизлик стандартларини жорий этиш имкониятини назарда тутишни сўраган.
Аввалроқ Францияда 15 ёшгача бўлган вояга етмаганларнинг ижтимоий тармоқлардан фойдаланишини чеклашга қаратилган қонун лойиҳаси парламентнинг ҳар икки палатаси томонидан қўллаб-қувватланган эди. Ҳужжат платформалардан фойдаланувчиларнинг ёшини текшириш механизмларини жорий этишни ҳамда 15 ёшгача бўлган болаларнинг аккаунтларини ёпишни назарда тутган.
Шунингдек, 15–18 ёшдаги ўсмирларнинг интернетдан фойдаланиш вақтини чеклаш учун “рақамли комендантлик соати” жорий этиш таклиф қилинган.
Бироқ Франция Конституциявий кенгаши мазкур тақиқни конституцияга мувофиқлиги нуқтаи назаридан рад этган. Макрон эндиликда масалани Европа Иттифоқи миқёсида умумий қонунчилик орқали ҳал қилишни таклиф қилмоқда.
